Mbretëresha Qiellore: Papa ia beson shën Marisë udhëtimin e tij në Brazil
(07.05.07 RV)Udhëtimi në Brazil
në emër të shën Marisë: mbi këtë temë e përqëndroi dje Papa Benedikti XVI Lutjen e
Mbretëreshës Qiellore para 30 mijë besimtarëve të mbledhur në sheshin e Shën Pjetrit
në Vatikan. “Kontineti i shpresës” e quajti Ati i Shenjtë, Amerikën Latine, duke
u bërë thirrje të krishterëve të jenë dëshmitarë të vërtetë të Krishtit. Por është
Zoja e Bekuar, Virgjëra e Shenjtë së cilës i kushtohet muaji i majit, “shkolla për
të mësuar si të jemi gjithnjë të gatshëm për të kryer vullnetin e Zotit”. Në pritje
të Rrëshajve, është pikërisht shën Maria, tha Papa, Nëna që shoqëron apostujt e mbledhur
në lutje. Kjo është udhëheqja për të gjithë besimtarët: Prandaj, ky muaj mund
të jetë rasti për t’iu kthyer fesë së Kishës së zanafillës dhe, në bashkim me shën
Marinë, të kuptojmë se edhe sot misioni ynë është të shpallim e të dëshmojmë me guxim
e gëzim Krishtin e kryqëzuar e të ngjallur, shpresë për njerëzimin. E pikërisht
Virgjërës së Shenjtë, Papa i beson edhe udhëtimin apostolik që do të kryejë këtë javë
në Brazil, nga 9 deri më 14 maj. Në Aparesida do të përurojë të dielën Konferencën
e Pestë të Përgjithshme të Episkopatit Latinoamerikan dhe të Karaibeve, ndërsa në
kryeqytetin shën Pali do të takojë të rinjtë dhe ipeshkvijtë e vendit. Po aty, do
të shpallë shenjt Fra Antonion e Shën Anës Galvao. Dje, Benedekti XVI u tha besimtarëve: Është
vizita ime e parë pastorale në Amerikën Latine dhe përgatitem shpirtërisht të takohem
me subkontinentin latinoamerikan, ku jeton gati gjysma e katolikëve të krejt botës,
shumë prej të cilëve janë të rinj. Për këtë është mbiquajtur “Kontinenti i shpresës”:
një shpresë që ka të bëjë jo vetëm me Kishën, por me krejt Amerikën e botën mbarë. Papa
i ftoi të gjithë që t’i luten Nënës së Zotit për mbarëvajtjen e këtij shtegtimi apostolik,
e në veçanti për konferencën e ipeshkvijve, që të gjithë të krishterët e atyre zonave,
të ndihen dishepuj dhe misionarë të Krishtit, Rruga, e Vërteta dhe Jeta: Të
shumta e të shumëllojshme janë sfidat e tanishme: ja përse është e rëndësishme që
të krishterët të jenë të formuar për të qenë “tharm” i së mirës dhe “dritë” shenjtërie
në këtë botë. Pas Lutjes së Mbretëreshës Qiellore, Papa përshëndeti shtegtarët
e shumtë zviceranë që kishin ardhur në Romë për betimin e 38 rojeve të reja zvicerane,
ceremoni që u zhvillua dje pasdite në Vatikan. Benedikti XVI përshëndeti gjithashtu
edhe fëmijet e “Maratonës së Pranverës”, çast kulmor i Festës së Shkollës organizuar
në bashkëpunim me Vikariatin e Romës, si rast takimi ndërmjet bashkësive shkollore
katolike të Romës. Atyre, Papa u tha: Të dashur miq, ju uroj gjithë të mirat
për festën tuaj, që bashkon sportin, muzikën dhe edukimin civil. “Maratonë” të mbarë
e sidomos urime për fundin e vitit shkollor.