Aktivitetet më të rëndësishme të Papës Benedikti XVI gjatë javës që kaloi
(06.05.07 RV)Dje, Ati i Shenjtë priti në sallën Klementina në Vatikan pjesëmarrësit
në Takimin e Këshillit të lartë të Veprave Papnore Misionare dhe në Kongresin Botëror
të Misionarëve “fidei donum”. Kongresi u zhvillua për të përkujtuar 50-vjetorin e
Letrës Enciklike “Fidei Donum” të Shërbëtorit të Zotit, Papës Piu XII. Është pikërisht
e asaj kohe, praktika e dërgimit të meshtarëve e rregulltarëve të bashkësive të lashta
katolike në tokën e ungjillëzimit, ku lindnin bashkësi të reja katolike, të cilat
kishin nevojë për ndihmë. Duke i falenderuar për impenjimin e tyre edhe sot kudo
në botë (kujtojmë se meshtarë e rregulltarë fidei donum janë dërguar edhe në Shqipëri),
impenjim që shpesh ka kërkuar prej misionarëve martirizimin e derdhjen e gjakut për
Krishtin, Papa Benedikti XVI tha: Përvoja misionare lë një shenjë të pashlyeshme
në atë që e kryen dhe njëkohësisht kontribuon për të ushqyer atë bashkim kishtar që
i bën të gjithë të pagëzuarit të ndihen anëtarë të së njëjtës Kishë, Korp mistik i
Krishtit. Para takimit me Papën, misionarët morën pjesë në Meshën e Shenjtë
të kremtuar nga kardinali Prefekt i Kongregatës për Ungjillëzimin e Popujve, imzot
Ivan Dias, ish-Nunc Apostolik në Shqipëri.
Po dje, Papa priti në Sallën
Klementine, rojet zvicerane të Vatikanit me familjarët e tyre. Sot, në orën 17.00,
38 prej tyre janë betuar të “sakrifikojnë nëse është e nevojshme, edhe jetën” për
të mbrojtur Papën dhe Pallatin Apostolik. Hyjnë kështu në gardën e famshme papnore,
që i shërben Vatikanit që prej 5 shekujsh. Histora e rojeve zvicerane është e lidhur
me sulmin e lanxekinekëve kundër Romës, më 6 maj 1527. 187 roje zvicerane, mercenarë
të marrë si mbrojtës nga Papa Xhulio II della Rovere në vitin 1506, luftuan në portat
e Bazilikës së Shën Pjetrit për të shpëtuar Papën Klementi VII. 140 prej tyre gjetën
vdekjen e vetëm 47 arritën ta shoqëronin Papën përmes mureve që lidhin Shën Pjetrin
me Kështjellën e shën Engjëllit, ku gjetën strehë të sigurtë. Për t’ia dalë mbanësh
detyrës së vështirë, u tha atyre Papa Benedikti XVI dje, ushqejeni shpirtin me lutje
e dëgjoni Fjalën e Zotit, merrni pjesë me devocion në Meshën Shenjte e përkushtojuni
shën Marisë.
Të premten, Ati i Shenjtë priti në Vatikan, ish-presidentin
e Iranit, Sejed Mohamad Khatamì. Të kapërcehen tensionet ndërmjet kulturave e feve
dhe të mbështen nismat për negociata serioze që sjellin paqen në Lindjen e Mesme:
kështu i tha Papa Benedikti XVI ish-presidentit iranian.
Udha e privilegjuar
për ta njohur Hyjin është dashuria: kështu tha mes tjerash Papa Benedikti XVI
gjatë audiencës së përgjithshme mbajtur të mërkurën në Sheshin e Shën Pjetrit në Vatikan,
kushtuar Origjenit, “mësuesit të madh aleksandrin” të Kishës së lashtë. Papa, duke
iu referuar muajit të majit që në mënyrë të posaçme i kushtohet Virgjërës Mari, ia
besoi besimtarët mbrojtjes amnore të Zojës së Bekuar. Në katekizmin e audiencës,
Benedikti XVI nënvizoi dy aspekte të doktrinës origjeniane: së pari mësimi i Origjenit
mbi lutjen dhe së dyti ai mbi Kishën.
“Mjedisi dhe zhvillimi i përshtatshëm”,
të drejtat e njeriut, si burrë dhe grua, krijuar sipas imazhit të Zotit, “barazia
dhe mundësia” për të shfrytëzuar “të mirat shpirtërore” siç janë “edukimi dhe njohja”:
sipas Papës Benedikti XVI këto janë tri sfidat kryesore të botës së sotme, që kërkojnë
një impenjim bindës drejtësie e dashurie. Kështu shkruan Ati i Shenjtë në mesazhin
e tij me rastin e Mbledhjes Plenare të Akademisë Papnore të Shkencave Shoqërore që
u zhvillua në Vatikan javën e kaluar mbi temën: “Dashuria e Drejtësia në marrëdhëniet
ndërmjet popujve e kombeve”.