Вернiкi розных канфесiй моляцца за зварот касцёла св. Язэпа ў Менску.
Кожную сераду перад будынкам былога каталiцкага касцёла св. Язэпа ў Менску збiраюцца
маладыя вернiкi, каб разам памалiцца аб яго звароце. 2 траўня памалiцца i запалiць
свечы сабралося каля 40 маладых людзей, сярод якiх былi як католiкi, так i прадстаўнiкi
iншых хрысцiянскiх канфесiй. Маладыя людзi малiлiся i спявалi рэлiгiйныя гiмны. Скончылася
спатканне спевам “Магутны Божа”. Пад час малiтвы ў дзверах былога касцёла з’явiлiся
дзве жанчыны i папрасiлi ўбраць свечы, якiя нiбыта залiваюць ступенi воскам, але самi
ўбраць свечы яны адмовiлiся. Адна з жанчын сказала: “Убярыце свечкi, бо заўтра
нас за гэта пакараюць. Зараз мiлiцыя тут ходзiць, у нас на 5 паверху мiлiцыя сядзiць.
Гэта вы паставiлi свечкi, гэта вам вялiкi грэх. А я прыйшла зарабляць грошы, падлогу
памыць…” Другая жанчына сказала: “Пажаранебяспечную сiтуацыю ствараеце тут. Потым
прыходзяць з адмiнiстрацыi… Ну калi не нальецца воска, то няхай гараць, мне абыякава…” Нагадаем,
што малiтвы перад будынкам былога касцёла св. Язэпа праходзяць штодзень у 18.20 менскага
часу. Звычайна на iх збiраецца каля 10 асобаў. Заклiкаем вас далучыцца да iх.