NATO mbështet planin e Ahtisarit. Sa më shpejt, rezoluta e re për Kosovën.
(27.04.07 RV)Ndërsa Misioni i Këshillit të Sigurimit vizitonte Mitrovicën në
Kosovë, në Oslo u zhvillua sot mbledhja e ministrave të jashtëm të vendeve anëtare
të NATO-s, ku u fol gjerësisht për Kosovën. Pati një mbështetje të përgjithshme për
planin e Ahtisarit dhe për faktin se Këshilli i Sigurimit duhet të arrijë sa më shpejt
në miratimin e një rezolute të re. Aleatët, tha për shtypin zëdhënësi i sekretarit
të përgjithshëm të Paktit, “nuk do ta shohin Kosovën si një rast të izoluar dhe NATO-ja
nuk do ta trajtojë Kosovën si një çështje të izoluar”. Vetë Sekretari i përgjithshëm,
Jap de Hop Skefer deklaroi se “Ky është një moment shumë kritik në zhvillimin e problemit.
Në fakt, kemi përpara dy rrugë: nga njëra anë ekziston procesi i kontrolluar nga rezoluta
e Këshillit të Sigurimit të Kombeve të Bashkuara, e cila jep një bazë ligjore dhe
një rrugë politike për të arritur në zgjidhje; nga ana tjetër, ekziston alternativa
e një procesi të pakontrolluar, të karakterizuar nga rreziqe të paparashikuara”. Natyrisht
NATO-ja dëshiron rrugën e parë. Janë politikanët ata që marrin vendime, theksoi Skefer,
por NATO-ja ka të impenjuar në terren 16 mijë burra e gra me uniformë e një interes
të madh që procesi të përfundojë sa më shpejt. Nga Serbia kërkohet bashkëpunim
me Gjykatën e Hagës, për të arritur më pas në një pjesëmarrje më të madhe në aktivitetet
e iniciativës Partneritet për Paqe e më vonë në integrimin e mundshëm në strukturat
e Paktit të Atllantikut.