Iu paraqitën mediave udhëzimet për Sinodin e Ipeshkvijve me temë: ‘Fjala e Zotit në
jetën e në misionin e Kishës’.
(27.04.2007 RV)Sot paradite në
Sallën e Shtypit të Vatikanit u paraqit para gazetarëve Lineamenta, apo udhëzuesi
i sinodit të ardhshëm të ipeshkvijve. Është sinodi i parë që thirret nga Benedikti
XVI me temë ‘Fjala e Zotit në jetën e misionin e Kishës’. Do të mbahet në Vatikan
në tetor 2008. Me kërkesë të gazetarëve, sekretari i përgjithshëm i Sinodit, kryeipeshkvi
Nikola Eteroviç, foli kryesisht për reformimin e vetë sinodit, në përkim me një dokument
zyrtar të Vatikanit, publikuar kohët e fundit. E kjo, sepse 40-vjet pas ‘Dei Verbum’,
Kushetutë e Koncilit II të Vatikanit, që reflekton për Zbulesën Hyjnore e për mënyrat
e transmetimit të saj, Kisha vëren se ka akoma fenomene që flasin për mosnjohje të
Doktrinës së vetë Zbulesës, për shkëputje të të krishterëve nga Bibla dhe për rrezikun
real të përdorimit jo korrekt të Shkrimit Shenjt. Këto janë edhe arsyet që i shtynë
ipeshkvijtë e mbarë botës të kërkonin nga Papa një sinod, në të cilin të diskutohet
pikërisht për Fjalën e Zotit, duke e parë të lidhur ngusht me jetën e misionin e Kishës.