Benedikti XVI në Pavi: Njerëzimi i sotëm ka akoma nevojë për Zotin!
(22.04.2007 (RV)Veprimtaria e fundit
e Papës në Pavi, ishte kremtimi i Lutjeve Mbrëmësore me meshtarët, rregulltarët, rregulltaret
e seminaristët e dioqezës në Bazilikën e Shën Pjetrit, që filloi rreth orës 17. 30.
Benedikti XVI u gjunjëzua para relikeve të Shën Agostinit, që ruhen në këtë bazilikë
që nga viti 725. Ishte një gjest shumë i rëndësishëm e domethënës për urdhërin agostinian
e për mbarë Kishën paveze. Më pas, në homelinë e mbajtur me këtë rast, Papa u
kujtoi të pranishmëve në kremtim, se në këtë ças përfundimtar, vizita në Pavi po merrte
formën e shtegtimit për të nderuar reliket e Shën Agostinit e për t’i shprehur nderimin
e mbarë Kishës katolike njërit nga Etërit më të mëdhenj të saj. Benedikti XVI pohoi
se ka një devocion të posaçëm për Shenjtin, i cili ka ushtruar një ndikim të fuqishëm
mbi jetën e tij si njeri, si meshtar, si teolog e si bari. Nga vendi ku mbarë bota
nderon reliket e Doctor gratie, Papa Racinger i transmetoi mbarë Kishës një
mesazh tepër domethënës për vijimin e rrugës së saj: “Jezu Krishti, Fjala e
mishëruar, Qengji i flijuar e i ngjallur, është dëftimi i fytyrës së Zotit Dashuri
për çdo njeri, që ecën në shtigjet e kohës, drejt amshimit. Kjo është zemra e Ungjillit,
bërthama e krishterimit”. Drita e kësaj dashurie - vijoi Ati i Shenjtë - ia
hapi sytë Shën Agostinit, duke e bërë të takohet me bukurinë e lashtë e gjithnjë të
re, e vetmja në të cilën gjen paqe zemra e trazuar e njeriut. Më pas, një ridorëzim: “Të
dashur vëllezër e motra, këtu para varrit të Shën Agostinit, dëshiroj t’i ridorëzoj
simbolikisht Kishës e botës Enciklikën time të parë, që përmban pikërisht këtë mesazh
kryesor të Ungjillit: ‘Zoti është dashuri”. Kjo enciklikë, posaçërisht pjesa e parë
e saj, u ndikua fuqimisht nga mendimi i Shën Agostinit, që ishte i dashuruar me dashurinë
e Zotit, të cilën e këndoi, e meditoi dhe e predikoi në të gjitha shkrimet e tij e,
sidomos, e dëshmoi në shërbimin e tij baritor”. Po - vijoi Papa – Zoti është
dashuri, gjithçka duhet të niset prej këtu e gjithçka duhet të na çojë po këtu. Të
gjitha karizmat e humbasin kuptimin pa dashurinë, falë së cilës të gjitha konkurojnë
për të ndërtuar Korpin Mistik të Krishtit:“Ja atëherë mesazhi që Shën Agostini
i përsërit mbarë Kishës, e posaçërisht kësaj bashkësie dioqezane, e cila ia ruan me
nderim reliket – shpjegoi Benedikti XVI - duke theksuar më pas me forcë: -
Dashuria është shpirti i jetës së Kishës dhe i veprimtarisë së saj baritore”. Vetëm
kush e ka provuar personalisht dashurinë e Zotit, mund ta kryejë si duhet detyrën
për t’u prirë atyre që duan të ecin në gjurmët e Krishtit”.