Mirënjohja e Benediktit XVI për anëtarët e ‘Fondacionit Papnor’, shoqatë e Kishës
amerikane, që mbështet bamirësinë e Atit të Shenjtë.
(20.04.2007 RV)‘Fondacioni Papnor’ amerikan, anëtarët e të cilit Benedikti
XVI i priti sot në Vatikan, e mbështesin prej vitesh veprimtarinë bamirëse të Papës
në mbarë botë. Një mbështetje të tillë ‘Fondacioni’ e nisi që në ditët e para të
krijimit – këtë kujtoi me mirënjohje Benedikti XVI në fjalimin drejtuar mysafirëve,
dhe në vijim i falënderoi anëtarët e ‘Fondacionit’ për ndihmën që u japin vendeve
në rrugën e zhvillimit përmes donacioneve, duke mbështetur një larmi projektesh edukative
e bamirëse, por edhe për bursat e shumta që u sigurojnë Universiteteve Papnore në
Romë në ndihmë të besimtarëve laikë, meshtarëve e rregulltarëve. Në fjalimin e
tij të shkurtër, Papa vuri në dukje shërbimin që kryen ‘Fondacioni’, i krijuar nga
ipeshkvjijtë e SHBA për të ndihmuar Kishat në zonat e varfëra të Planetit, si në fushën
humanitare, ashtu edhe në atë të përhapjes së Ungjillit.“Gjatë kësaj kohe Pashkësh
– u tha Papa – ju inkurajoj të gjithëve ta zbuloni më thellësisht në Eukaristi,
sakrament i dashurisë flijuese të Krishtit, frymëzimin dhe forcën e nevojshme për
të punuar edhe më bujarisht në përhapjen e Mbretërisë së Zotit dhe në lulëzimin e
qytetërimit të dashurisë”.