Papa kryeson në orën 22. 00 kremtimin e Natës së Pashkëve.
(07.04.2007 RV)Këtë natë Kisha rri pa gjumë e pret Ngjalljen e Zotit. Triditshja
e Pashkëve është kulm i gjithë vitit liturgjik, e thelbi i saj është pikërisht kjo
Natë, Nënë e të gjitha netëve të lutjes, në të cilën kremtojmë Krishtin e ngjallur.
Benedikti XVI do të kryesojë, në Bazilikën e Vatikanit, kremtimin solemn të Natës
së Shenjtë, duke nisur me bekimin e zjarrit të ri në tremen e Bazilikës. Pas hyrjes
me proçesion në Bazilikë me qiriun e Pashkëve dhe këngën Exultet, Papa do të kryesojë
Liturgjinë e Fjalës, Liturgjinë e Pagëzimit dhe Liturgjinë Eukaristike, në bashëkremtim
me kardinaj, patrikë, kryeipeshkvij, ipeshkvij e meshtarë. Radio Vatikani do ta
ndjekë drejtpërdrejtë kremtimin e madh me komente në gjuhët kryesore të botës, duke
filluar nga ora 21. 50 e, me të, edhe 108 televizione nga 67 vende e botës.