(05.04.2007 RV)Njëkohësisht me Papën në Romë, edhe në Jeruzalem nisën kremtimet
e Triditshes së Pashkëve, ndërsa turmat e shtegtarëve kthehen në Qytetin Shenjt në
një atmosferë lutje e besimi. Numri i shtegtarëve sivjet është edhe më i madh, sepse
Pashkët katolike e ortodokse kremtohen në të njëjtën kohë. Prandaj që dje të gjitha
hotelet e shtëpitë rregulltare janë plot me shtegtarë, të cilët sot paradite ndoqën
Meshën e Darkës së Mbrame të Krishtit në Bazilikën e Varrit të Shenjtë, ku u hapën
kremtimet e Triditshes së Pashkëve, kryesuar nga patriku latin i Jeruzalemit, Imzot
Mishel Sabah. Nesër turma e shtegtarëve do t’i ngjitet Kalvarit, për të marrë pjesë
në flijimin e Krishtit në kryq e pastaj edhe në ngjalljen e Zotit, pikërisht mbi vendin
ku apostujt gjetën varrin e zbrazur e panë lumninë e ngjalljes së Jezusit.