Këshilli i Sigurimit për Kosovën: brenda prillit rezoluta e Grupit të Kontaktit.
(04.04.07 RV)Do të jenë të vështira e të gjata, me përfundim të pasigurtë,
diskutimet që filluan mbrëmë në Këshillin e Sigurimit të OKB-së për statusin e Kosovës.
SHBA-të dhe Bashkimi Evropian konfirmuan përkrahjen për planin e Ahtisarit, që parashikon
pavarësi të mbikqyrur. Por nuk është i të njëjtit mendim Rusia, e cila dje kërkoi
dhe arriti që kryeministri serb, Vojisllav Koshtunica të dëgjohet nga 15 anëtarët
zyrtarisht, si përfaqësues i një shteti, ndërsa presidenti i Kosovës, Fatmir Sejdiu
të shpjegonte arësyet e shqiptarëve në një sallë ngjitur me atë të mbledhjeve zyrtare
të Këshillit të Sigurimit e ta bënte këtë në formë jo zyrtare. Ambasadori rus në OKB,
Vitali Çurkin do të sqaronte më pas gazetarët se Moska nuk dëshiron të vendosë në
të njëjtin plan përfaqësuesin e një shteti me atë të një province. Ndër propozimet
e Rusisë, është ai i dërgimit të një misioni në Prishtinë dhe në Beograd për të parë
si është zbatuar rezoluta 1244 e Këshillit të Sigurimit, gjë që do t’i çonte bisedimet
edhe një herë në nivelin e realizimit të standarteve për shqiptarët e Kosovës. Pritet
vendimi i Këshillit të Sigurimit, por nëse propozimi miratohet, pa dyshim do të ngadalësojë
krejt procesin. Ambasadori i Britanisë së Madhe në OKB, Emir Xhons Perri, presidenti
aktual i Këshillit, deklaroi se një rezolutë e mundshme për Kosovën do të diskutohet
fillimisht në Grupin e Kontaktit, i cili do të mblidhet gjatë këtij muaji. Përshtypja
është se politika aktuale e Këshillit të Sigurimit është “me të parë e me të bërë”,
prandaj rezultati i diskutimeve është i pasigurtë. Brenda Bashkimit Evropian, ka
vende që kanë shprehur rezerva ndaj planit të Ahtisarit. Parlamenti sllovak ka votuar
kundër pavarësisë për Kosovën e Spanja ka frikë se Kosova mund të jetë një precedent
i rrezikshëm, që mund të favorizojë aspiratat indipendentiste të baskëve. Gjithsesi,
shtetet evropiane janë të bindura se mosndryshimi i gjendjes së Kosovës do të ishte
mjaft i rrezikshëm për stabilitetin në Evropë.