Parlamenti Evropian miraton rezolutën mbi Kosovën.
(29.03.07 RV)Parlamenti Evropian i dha sot mbështetjen e vet planit të Marti
Ahtisarit për Kosovën, duke votuar një rezolutë me 490 vota pro, 80 kundër dhe 87
abstenime. “Parlamenti Evropian vë në dukje se vendimi i vetëm i pranueshëm për Kosovën
është ai që parashikon praninë ndërkombëtare me qëllim që të ruhet karakteri multietnik
i Kosovës”, thuhet në rezolutë. Fjala e përdorur nga parlamentarët për statusin e
Kosovës është “sovranitet i mbikqyrur”. Në fjalimin e tij, Përfaqësuesi i Lartë
evropian për Politikën e Jashtme dhe Sigurinë, Havier Solana, sqaroi se Bashkimi Evropian
është gati për dërgimin e dy misioneve në Kosovë, të cilat do të nisin sapo të miratohet
rezoluta e re në Këshillin e Sigurimit të OKB-së. “Nuk mund të dështojmë – u shpreh
Solana për dy misionet, atë civil dhe atë policor. Është në lojë stabiliteti i Ballkanit”.
Gjithsesi, prania e ardhshme e Bashkimit Evropian nuk ka për qëllim të krijojë një
lloj administrate paralele me atë kosovare dhe as të dublojë punën e UNMIK-ut. Ky
është misioni më i madh që ka marrë ndonjëherë përsipër Bashkimi Evropian dhe do të
synojë përgatitjen e personelit lokal për krijimin e institucioneve autonome, policisë
dhe sistemit gjyqësor. Mbetet problem qëndrimi i Rusisë e ndoshta dhe i Kinës në
Këshillin e Sigurimit. Në takimin me kolegun portugez në Moskë, ministri i jashtëm
rus Sergei Lavrov deklaroi sot se plani i Ahtisarit është i dënuar të falimentojë
nëse nuk do të marrë parasysh si kërkesat serbe, ashtu edhe ato kosovare, duke u dhënë
të njëjtën peshë. Gjatë vizitës së sotme në Gjakovë, presidenti i Kosovës Fatmir Sejdiu
i bëri thirrje Rusisë që të tregohet konstruktive në këtë fazë përfundimtare të përcaktimit
të statusit të vendit.