Propozimi i Ahtisarit mbi Kosovën në Këshillin e Sigurimit. Mbështetje nga Ban Ki-Mun
e SHBA-të.
(26.03.07 RV) SHBA-të mbështesin
plotësisht planin e Ahtisarit për një pavarësi të mbikqyrur për Kosovën. Përsëritja
e qëndrimit të Uashingtonit bëhet sot në Bruksel nga ndihmës sekretari amerikan i
Shtetit, Nikolas Bërns. Gjatë një konference për shtyp, Bërns theksoi se pritet
që Këshilli i Sigurimit të dalë me një rezolutë për Kosovën në verën e këtij viti.
Diskutimet mbi propozimin e Ahtisarit do të jenë të ndërlikuara për shkak të qëndrimit
të Rusisë e të Kinës, të cilat kanë kërkuar një zgjidhje, që t’u pëlqejë si serbëve,
ashtu edhe kosovarëve. SHBA-të dhe Bashkimi Evropian kanë filluar një punë diplomatike
me të dyja këto vende për të evituar përdorimin e vetos në Këshillin e Sigurimit.
Po
sot, Këshilli i Sigurimit i Kombeve të Bashkuara ka marrë në dorëzim propozimin për
statusin e Kosovës. Zëdhënësi i Ahtisarit, Remi Durlò ka deklaruar se nuk dihet akoma
nëse plani do të bëhet i njohur për publikun, pavarësisht se shumë pjesë prej tij
janë madje publikuar tashmë nga gazeta të ndryshme. Pritet që Ahtisari të ftohet në
prill në Këshillin e Sigurimit për të diskutuar me anëtarët, propozimin e tij, megjithëse
nuk është caktuar një datë zyrtare për këtë. Rekomandimin e Ahtisarit për pavarësi,
me një periudhë tranzicioni të mbikqyrur nga bashkësia ndërkombëtare, e ka mbështetur
plotësisht edhe Sekretari i Përgjithshëm i OKB-së, Ban Ki-Mun. Ndërkaq, dipllomatë
nga SHBA-të, Britania e Madhe, Gjermania, Franca, Italia dhe Rusia, anëtarë të Grupit
të Kontaktit, do të mblidhen të mërkurën në Londër për të diskutuar mbi problemin
e Kosovës.