(26.03.07 RV)“Asgjë e re”: kështu e hodhi poshtë presidenti i Iranit, Ahmadinexhad
rezolutën e re të Këshillit të Sigurimit, e cila ashpërson sanksionet kundër Republikës
Islamike. Programi bërthamor i Teheranit do të vazhdojë. Ndërkaq, Evropa i mban shpresat
në bisedën telefonike ndërmjet përfaqësuesit të saj për politikën e jashtme, Havier
Solana dhe atij iranian për programin bërthamor, Ali Larizhani, për të rifilluar diskutimin
e çështjes në nivelin diplomatik. Ndërkaq, Irani mban 15 britanikë të akuzuar për
shkelje të ujrave territoriale, pavarësisht nga thirrjet e vazhdueshme për t’i liruar,
edhe nga ana e vendeve arabe.
Ministrat e jashtëm të Lidhjes Arabe të
mbledhur në Riad të Arabisë Saudite vendosën sot të mbështesin planin saudit për
paqen me Izraelin, të hartuar në vitin 2002, “në formën e tij fillestare dhe pa amendamente”.
Plani i ofron Izraelit lidhjen e marrëdhënieve diplomatike në këmbim të tërheqjes
nga të gjitha territoret arabe të pushtuara në luftën e vitit 1967. Gjithashtu, Izraeli
duhet të lejojë krijimin e një shteti palestinez dhe kthimin e refugjatëve. Në vitin
2002, Izraeli nuk e pat pranuar planin, por kryeministri aktual Ehud Olmert ka deklaruar
se ai është një bazë e mirë fillestare. Vendimi i ministrave të jashtëm arabë duhet
të ratifikohet tani nga mbledhja e krerëve të Lidhjes Arabe, e cila do të mbahet më
28 e 29 mars, po në Riad.
Sekretarja amerikane e shtetit, Kondolica
Rajs ndodhet sot në Aman të Jordanisë, ku ka pasur bisedime të veçanta me mbretin
Abdallah II të Jordanisë dhe me presidentin palestinez Abu Mazen, në përpjekjen për
të gjetur mbështetje për planin e paqes për Lindjen e Mesme. Abu Mazen ka kërkuar
bisedime të drejtpërdrejta me Izraelin, për çështje thelbësore e jo vetëm për çështje
humanitare apo për sigurinë. Në zonë ndodhet edhe sekretari i Përgjithshëm i OKB-së,
Ban Ki-Mun, i cili është takuar me kryenimistrin izraelit, Olmert.
Në
Egjipt u mbajt sot referendumi për ndryshime në Kushtetutën e vendit. Qeveria
e Kajros ka deklaruar se 34 amendamentet e propozuara, janë pjesë e reformave në procesin
politik, por opozita dhe grupet për të drejtat e njeriut vlerësojnë se këto ndryshime
do ta largojnë vendin nga demokracia.
Janë së paku 100, talebanët e
vrarë gjatë luftimeve të fundit të ushtrisë së NATO-s dhe asaj afgane në jug të
Afganistanit. Pas 20 ditë nga fillimi i operacionit Akili, në rrethin e Helmandit
është qeveria e Kabulit ajo që jep bilancin zyrtar.