Të ndërtohet Evropa e vlerave, e bashkuar e me rrënjët në traditën e saj të krishterë.
(23.03.2007 RV)Sot në Romë u hap
edhe Kongresi i Episkopateve Evropiane, në të cilin marrin pjesë delegacionet e 23
konferencave ipeshkvnore të Bashkimit Evropian, por edhe përfaqësues të realiteteve
dhe lëvizjeve të ndryshme të laikatit katolik. Për të rikrijuar lidhjet e Evropës
me shtetasit e vet, është i nevojshëm kthimi në parimet e zanafillës, në atë traditë
të krishterë që përfaqëson pasurinë e saj më të madhe. Për këtë bëri thirrje Kongresi
Evropian i COMECE-s (Komisionit të Episkopateve të Bashkimit Evropian) përqëndruar
tek vlerat dhe perspektivat e Evropës të së nesërmes. Punimet i hapi me një çast lutjeje,
ipeshkvi i Roterdamit, imzot Adrianus van Luin, Kryetar i COMECE-s. Më pas imzot van
Luin theksoi se nganjëherë politika e Bashkimit Evropian të krijon përshtypjen e reduktimit
të njeriut në prodhues ose në konsumator, duke harruar se njeriu është edhe qenie
shpirtërore e fetare. Të krishterët e Episkopateve Evropiane duhet t’ia kujtojnë vazhdimisht
këtë parim institucioneve të Kontinentit të vjetër. Më pas u lexua mesazhi drejtuar
Kongresit nga presidenti i Republikës italiane, Gjorgjio Napolitano, në të cilin theksohej
se procesi i integrimit evropian mund të marrë një shtytje të re nga kremtimet e
këtyre ditëve. Më pas presidenti italian, duke vlerësuar rolin e Kishës, statusi dhe
kontributi i së cilës në dialogun me institucionet evropiane njihet solemnisht në
Traktatin Kushtetues – theksoi se Kisha dhe shoqatat me frymëzim fetar duhet ta nxisin
fuqizimin e Bashkimit Evropian, duke dëshmuar vlerat më të thella, që janë në bazë
të ndërtimit të Evropës së Bashkuar. Në Kongres foli edhe kryetari i Konferencës
ipeshkvnore italiane, imzot Angelo Banjasko, i cili theksoi se Evropa nuk duhet të
mjaftohet vetëm me bashkimin ekonomik: “Që procesi i integrimit të nisur të
jetë vërtetë i suksesshëm, duhet që Evropa të njohë rrënjët e veta të krishtera, duke
vlerësuar si duhet parimet etike që janë pjesë përbërëse themelore e trashëgimisë
së saj shpirtërore, nga të cilat burojnë vetë vlerat e Evropës moderne, pa mohuar
laicitetin e shëndoshë të institucioneve evropiane” Imzot Banjasko
përcaktoi katër fushat kryesore, në të cilat Kisha duhet të japë ndihmesën e vet të
drejtpërdrejtë. Janë: mbrojtja e jetës njerëzore, e familjes, e të drejtave të prindërve
për edukimin e fëmijëve dhe e lirisë fetare, jo vetëm në përmasën individuale, por
edhe në përmasën e mirëfilltë institucionale. Ministri i brëndshëm gjerman, Volfgang
Shauble pohoi se duhet shikuar me guxim e ardhmja, por pa harruar asnjëherë rrezikun
e humbjes së kulturës, të historisë e të identitetit. Ndërsa zevendës-kryetari
i Komisionit Evropian, Franko Fratini, nënvizoi se laiciteti i shteteve dhe feja e
popujve nuk duhen parë në kundërshtim njëri me tjetrën. Prej këndej, i nxiti institucionet
evropiane të shënojnë në agjendën e tyre temën e rrënjëve të krishtera të Evropës: “Dhe
ja, së fundi, që tema e rrënjëve të krishtera vë në plan të parë temën e një krishterimi
që nuk është nostalgji për të kaluarën, por mendim i gjallë. Një krishtërim që me
Papën Vojtila theksoi temën e të drejtave – e me Papën Ratzinger, temën e lirisë,
si rrugë dialogu, është plotësisht në shërbim të ëndrrës evropiane e të ardhmërisë
sonë”. Evropa e vlerave, prandaj, nuk është vetëm e interesave ekonomike e
politike. Kjo theksohet edhe në bocën e mesazhit të Romës, teksti përfundimtar i të
cilit do t’i dorëzohet Këshillit të Evropës të dielën, më 25 mars, në Berlin. Në dokumentin
me dhjetë pika, udhëheqësit e Bashkimit nxiten të njohin ato vlera e parime që motivuan
Bashkimin Evropian qysh në fillimet e tij, duke nisur nga mbrojtja e jetës dhe e
familjes; kërkohet gjithashtu edhe respektimi i të drejtave të Kishave dhe të bashkësive
fetare. Mesazhi i Romës mbyllet me një thirrje të fuqishme drejtuar gjithë të krishterëve
evropianë që të forcojnë impenjimin e tyre në favor të paqes, të lirisë e të solidaritetit.