Takim i përzemërt i Papës me presidenten irlandeze, MkAlis.
(23.03.2007 RV)Sot paradite Benedikti XVI priti në Vatikan zonjën Meri MkAlis,
presidente e Irlandës, shoqëruar nga bashkëshorti e një grup personalitetesh. Gjatë
takimit, që u zhvillua në një atmosferë shumë të përzemërt – pohon një notë e Sallës
së Shtypit të Vatikanit – u fol për gjendjen aktuale të Kishës në Irlandë dhe për
arritjet pozitive të dialogut ndërmjet shtetit e Kishave, në frymën e Traktatit të
ri Kushtetues Evropian, si rrugë për kontributin pozitiv të kishave në jetë e në shoqëri.
U prekën temat më të përgjithshme të ndërtimit të Evropës e të rrënjëve të saj të
krishtera si dhe të zhvillimit të procesit të paqes në Irlandën e Veriut. Presidentja
e uroi Papën për 80-vjetorin e ditëlindjes, që Ati i Shenjtë do ta kremtojë më 16
prillin e ardhshëm. Më pas presidentja irlandeze u prit edhe nga sekretari i
Shtetit të Vatikanit, kardinali Tarçizio Bertone. Po sot Papa priti edhe presidentin
e Parlamentit Evropian Hans-Gert Pëtering i cili ndodhet në Romë për kremtimet e 50-vjetorit
të nënshkrimit të Traktateve të Romës.