Në Ditën botërore të ujit, Papa kërkon të drejta të barabarta për të gjithë.
(22.03.2007 RV)Sot, në Ditën botërore të ujit, Papa bëri thirrje që mbarë familja
njerëzore të gëzojë drejta të barabarta në shfrytëzimin e kësaj pasurie kaq të domosdoshme
për jetën. Uji është një e drejtë e patjetërsueshme – thekson Papa në mesazhin
për Ditën botërore të ujit me temë “Të përballohet zija e ujit”, që u kremtua sot
në Romë me një Konferencë ndërkombëtare organizuar nga Fao. Ishte i pranishëm edhe
imzot Renato Volante, vëzhgues i përhershëm i Selisë së Shenjtë pranë Oganizatës së
Kombeve të Bashkuara për bujqësinë e ushqimin. “Të ruhet çdo pikë uji” ishte motua
e kësaj Dite botërore, kremtuar në atmosferën e krizës hidrike që peshon mbi jetën
e 1 miliard e 100 milion njerëzve, të cilëve u mungojnë edhe 20 litrat e ujit të domosdoshëm
për të pirë, për të gatuar e për të siguruar higjienën e përditshme.Problemi i shfrytëzimit
të kësaj pasurie kuptohet mirë në ato vende ku uji ndërpritet, vjen me pakicë ose
mungon fare, sidomos në stinën e nxehtë që po afrohet. E shqiptarët janë ndërmjet
atyre që e kuptojnë shumë mirë parullën e kësaj dite.