У Арменiю прыйшло афiцыйнае запрашэнне з Турцыi прыняць удзел у цэрымонii адкрыцця
армянскай царквы “Святога Крыжа” на востраве Ахтамар, якi знаходзiцца на возеры Ван.
Аб гэтым заявiла мiнiстр культуры i да спраў маладзi Арменii спадарыня Асмiк Пагасян.
Пры гэтым яна адзначыла, што афiцыйнае запрашэнне было выслана на яе iмя. Мiнiстр
мяркуе, што афiцыйную дэлегацыю ўзначалiць яе намеснiк. Разам з тым, некаторыя арганiзацыi
Арменii ўжо выказалi жаданне накiраваць сваiх прадстаўнiкоў у складзе дэлегацыi ў
Турцыю. Аб сваiм жаданнi прысутнiчаць на адкрыццi царквы таксама заявiў i мiнiстр
культуры, аховы помнiкаў i спорта Грузii спадар Рыгор Габашвiлi. З мэтай забяспечэння
прысутнасцi армянскай дэлегацыi ва ўрачыстым адкрыццi царквы “Святога Крыжа” турэцкi
ўрад прыняў рашэнне арганiзаваць спецыяльны авiапералёт. Як паведамляе армянскае турыстычнае
агенства “Баграт-тур”, згаданы рэйс па маршруту Ерэван-Ван будзе арганiзаваны з 26
сакавiка да 1 красавiка, але, магчыма, што авiапералёты будуць праходзiць праз Iстамбул. Царква
“Святога Крыжа” – гэта царква, якую не рызыкнулi знiшчыць нават пад час масавага разбурэння
туркамi цэркваў на тэрыторыi Заходняй Арменii. Дзякуючы сваёй сусветнай вядомасцi
яна пазбавiлася ад вандалiзму.