(20.03.07 RV)Ka shkuar në 106 numri i viktimave nga shpërthimi i djeshëm në
një minierë qymyri në Siberi. Ky është aksidenti më i rëndë në minierat ruse, që nga
koha e Bashkimit Sovjetik. Sot, në rrënojat e minierës, u gjet një person akoma i
gjallë. Në një tjetër incident, në një shtëpi për të moshuar, së paku 63 persona kanë
vdekur nga zjarri.
Dy ditë para Ditës Botërore të Ujit, që kremtohet
më 22 mars, Fondi Botëror për Natyrën (ËËF) bën të ditur në një raport se po thahen
lumenjtë më të mëdhenj të botës, duke shkaktuar një rrezik serioz për furnizimin me
ujë të popullsive që jetojnë pranë tyre. 10 lumenjtë e studiuar, për Evropën – Danubi,
kanë probleme jo vetëm për shkak të ndryshimeve të klimës, por edhe për shkak të ndotjes
së ambientit e të digave të ndërtuara nga njeriu. Jemi para një krize, për të cilën
qeveritë e botës duhet të marrin menjëherë masa, thekson Fondi.
Presidenti
iranian Ahmadinexhad pritet të enjten në Këshillin e Sigurimit të OKB-së për të
folur mbi planin bërthamor të Teheranit. Sot, njoftohet se Rusia ka kërcënuar të mos
furnizojë me karburant një nga centralet bërthamore të Iranit, nëse nuk plotësohen
kushtet e rezolutës së OKB-së mbi Iranin, e cila kërkon ndalimin e pasurimit të uraniumit.