Nga Eukaristia burojnë gëzimi dhe dashuria e krishterë: këtë theksoi dje Papa në lutjen
e Engjëllit të Tënzot, kushtuar “Sacramentum Caritatis”.
(19.03.2007)Dje në
lutjen e Engjëllit të Tënzot, kremtuar si zakonisht në Sheshin e Shën Pjetrit, Benedikti
XVI kujtoi vizitën e tij të paradites në burgun e të miturve të Kazal Marmos e më
pas u ndalua tek Eukaristia “burim i gëzimit të krishterë”. Ati i Shenjtë vuri theksin
mbi lidhjen ndërmjet Enciklikës së tij “Deus Caritas est” dhe Nxitjes pas-sinodale
“Sacramentum Caritatis” paraqitur të martën e kaluar. Pastaj, duke kujtuar
solemnitetin e sotëm liturgjik, Papa Jozef Ratzinger iu lut Shën Jozefit që populli
i Zotit ta përhapë gëzimin e paqen në zemrën e mbarë njerëzimit. Në Eukaristinë,
që Krishti na e la si ushqim shpirtëror, gjejmë burimin e gëzimit të krishterë: ky
është thelbi i reflektimit të Papës në praninë e mijëra shtegtarëve e besimtarëve,
mbledhur në Sheshin e Shën Pjetrit për lutjen e së dielës. Ati i Shenjtë kujtoi edhe
se liturgjia e së dielës së katërt të Krezhmëve na fton të gëzohemi, sepse afrohet
dita e Pashkëve, dita e fitores së Krishtit mbi mëkatin e mbi vdekjen. Nga Eukaristia
– pohoi Papa – buron gëzimi i krishterë, gëzimi i dashurisë: “Eukaristia mban
gjallë në zemrat e besimtarëve të të gjitha epokave atë gëzim të thellë, që bëhet
një me dashurinë e me paqen e që e ka zanafillën e vet në bashkimin me Zotin e me
vëllezërit”. Papa foli më pas për nxitjen e tij apostolike pas-sinodale “Sacramentum
caritatis” me temë “Eukaristia, burim e kulm i jetës dhe i misionit të Kishës”.
Ky dokument – tha Benedikti XVI – është shprehje e besimit të Kishës universale në
Misterin eukaristik e vijim i ecjes në gjurmët e Koncilit II të Vatikanit e të magjisterit
të Gjon Palit II e të Palit VI. Ati i Shenjtë nënvizoi edhe lidhjen ndërmjet nxitjes
pas-sinodale dhe Enciklikës së tij mbi dashurinë e krishterë: “Ja pse zgjodha
si titull ‘Sacramentum caritatis’, duke përsëritur përkufizimin e bukur të Shën Tomës
së Akuinit, që e quajti Eukaristinë “Sakrament i dashurisë”. Po, në Eukaristi Krishti
desh të na dhurojë dashurinë e vet, e cila e shtyu të flijojë jetën në Kryq për ne.
Në Darkën e Mbrame, duke larë këmbët e nxënësve të vet, Jezusi na la urdhërimin e
dashurisë: “Ashtu si ju kam dashur unë, ashtu duajeni edhe ju njëri-tjetrin!”. Por,
vërejti Papa, me që kjo është e mundur vetëm duke qenë të bashkuar me të, si shermendët
me hardhinë, mbeti Ai vetë me ne në Eukaristi, që ne të mbeteshim në Të. Prandaj –
vijoi reflektimin Ati i Shenjtë – kur ushqehemi plot besim me Korpin e Gjakun e Tij,
dashuria e Tij kalon në ne e na bën të aftë të japim jetën për vëllezërit. Simbol
i Gruas eukaristike – shpjegoi Papa – është Virgjëra Mari, kryevepër e hirit hyjnor.
Pranë saj, për t’u kujdesur për Shëlbuesin, Zoti vuri Shën Jozefin, solemnitetin liturgjik
të të cilit do ta kremtojmë nesër:“I lutem posaçërisht këtij shenjti të madh, pajtorit
tim, që duke e besuar, duke e kremtuar e duke e jetuar me fe Misterin eukaristik,
Populli i Zotit të mbushet me dashurinë e Krishtit e t’i përhapë frytet e paqes e
të gëzimit që buron prej saj në jetën e mbarë njerëzimit”.