Papa priti në audiencë presidentin e Federatës Ruse, Vladimir Putin: komunikatë e
Sallës së Shtypit të Vatikanit.
(13.03.2007 RV)Presidenti rus Putin arriti në Vatikan pak para orës 18. Shoqërohej
nga 14 zyrtarë të lartë të Federatës Ruse. Për ta pritur, në oborrin e Shën Damasit
kishin dalë prefekti i Shtëpisë Papnore, Xhejms Harvei dhe një skuadër nderi e Rojës
papnore zvicerane. Bisedimet, zhvilluar në gjuhën gjermane në Bibliotekën private
të Pallatit Apostolik, zgjatën rreth 25 minuta. Në deklaratën e Sallës së Shtypit
të Selisë së Shenjtë shkruhet: “Sot pasdite, 13 mars 2007, Ati i Shenjtë Benedikti
XVI priti në audiencë Shkelqësinë e Tij, zotin Vladimir Putin, President i Federatës
Ruse. Njëkohësisht, në Sekretarinë e Shtetit të Shenjtërisë së Tij, sekretari i Shtetit
të Vatikanit, kardinali Tarçizio Bertone, u takua me ministrin e jashtëm rus, Sergei
Lavrov dhe me delegacionin që shoqëronte Presidentin. I pranishëm edhe sekretari i
Vatikanit për marrëdhëniet me shtetet, Imzot Dominik Mamberti. Bisedimet, zhvilluar
në një atmosferë shumë pozitive, krijuan mundësitë për të vënë në dukje marrëdhëniet
e përzemërta që ekzistojnë ndërmjet Selisë së Shenjtë dhe Federatës Ruse si dhe vullnetin
e mirë për t’i çuar më tej këto marrëdhënie edhe me nisma të karakterit kulturor.
Në këtë kuadër u shqyrtuan disa tema me interes dypalësh lidhur me marëdhëniet ndërmjet
Kishës katolike e Kishës ortodokse dhe u analizuan çështje të aktualitetit ndërkombëtar,
posaçërisht lidhur me Lindjen e Mesme. Nuk mungoi edhe vëmendja kushtuar problemeve
të ekstremizmit dhe të intolerancës, që kërcënojnë rëndë bashkëjetesën civile ndërmjet
Kombeve, duke nënvizuar nevojën për ruajtjen e paqes dhe favorizimin e zgjidhjeve
paqësore të konflikteve me rrugën e bisedimeve”. Pastaj, sipas traditës, shkëmbimi
i dhuratave: Presidenti rus i dhuroi Papës një ikonë të Shën Nëkollit, punuar sipas
metodës tradicionale të shkollës së Palehut në të cilën Shenjti paraqitet duke bekuar
me dorën e djathtë, në sa në të majtën mban Ungjillin.