Raporti amerikan mbi të drejtat e njeriut: Shqipëria dhe Kosova.
(07.03.06 RV)Departamenti amerikan i shtetit bëri të ditur dje Raportin e tij
vjetor mbi të drejtat e njeriut në botë, që i referohet vitit 2006. Përsa i përket
Shqipërisë dhe Kosovës, raporti sinjalizon se në përgjithësi të drejtat e njeriut
janë të respektuara, por nuk mungojnë problemet. Përsa i përket Shqipërisë vihet
në dukje se në disa zona mbetet problem korrupsioni i policisë dhe paaftësia për ta
dënuar atë. Gjithashtu, kushtet e arrestimeve dhe të paraburgimit janë jashtë standarteve
e shoqërohen me raste abuzimesh mbi të burgosurit. Raporti vë në dukje atmosferën
e frikës dhe vrasjet për shkak të gjakmarrjes. Departamenti i shtetit denoncon dhunën
dhe diskriminimin ndaj grave dhe fëmijëve, si edhe trafikun e personave. Gjithashtu,
nxjerr në pah diskriminimin shoqëror ndaj homoseksualëve, romëve dhe egjiptianëve
të Ballkanit, apo jevgjëve. Në Kosovë, problemet e respektimit të të drejtave të
njeriut lidhen me pakicat etnike. Më seriozet janë rastet e vrasjeve të motivuara
politikisht dhe etnikisht; vrasjet dhe plagosjet nga minat e pashpërthyera; mbajtjet
e gjata në paraburgim dhe mungesa e procesit gjyqësor; korrupsioni dhe ndërhyrja qeveritare
në gjykata; antipatia e shoqërisë ndaj serbëve dhe ndaj Kishës Ortodokse serbe; mungesa
e përparimeve në kthimin e personave të shpërngulur në shtëpitë e tyre; dhuna dhe
diskriminimi ndaj grave; trafiku i personave, veçanërisht i grave dhe i vajzave për
shfrytëzim seksual; abuzimi dhe diskriminimi ndaj pakicave entike; diskriminimi social
ndaj personave me aftësi të kufizuara; abuzime dhe një vrasje homoseksualësh; shfrytëzimi
i punës së fëmijëve.
Një projektligj në mbështetje të zgjerimit të
mëtejshëm të NATO-s ka mbërritur në Senatin e Shteteve të Bashkuara të Amerikës,
paraqitur nga senatori republikan, Riçard Lugar. Në të kërkohet që NATO-ja të përfshijë
sa më shpejt Shqipërinë, Kroacinë, Maqedoninë, Gjeorgjinë dhe Ukrainën si anëtarë
të plotë të aleancës. Ky projektligj është miratuar në Komitetin për marrëdhëniet
me jashtë të Senatit dhe nga Dhoma e Përfaqësuesve, por tani duhet t’i nënshtrohet
votimit të Senatit. Gjithashtu, duhet të miratohet edhe nga presidenti Xhorxh Bush.