Të mërkurën propozimi i ri i Ahtisarit për serbët e kosovarët.
(05.03.07 RV)Të mërkurën, pritet që kryenegociatori i OKB-së për statusin e
Kosovës, Marti Ahtisari t’i dorëzojë propozimin e tij të rishikuar, më parë serbëve
e pastaj kosovarëve. Bisedimet që përfunduan javën e kaluar në Vjenë, nuk ndryshuan
qëndrimet e palëve, prandaj pritet që ndryshimet nga plani fillestar i Ahtisarit,
të mos jenë të mëdha. Janë të bindur për këtë edhe vetë serbët, të cilët nëpërmjet
një anëtari të delegacionit, Aleksandër Simiq, e kanë shprehur këtë mendim edhe për
mediat e tyre.
Ministrat e jashtëm të Bashkimit Europian diskutuan sot
në Bruksel edhe për çështjen e Kosovës. Vëmendje e veçantë iu kushtua formimit të
qeverisë së re serbe, e cila akoma nuk duket në horizont.
Me qëndrimin
e sotëm në Beograd, ndihmës sekretari amerikan i shtetit, Daniel Frid filloi turneun
e tij ballkanik. Përveç Beogradit, Frid viziton edhe Prishtinën dhe Shkupin. Para
vizitës në rajon, ai ka deklaruar se asnjë zgjidhje për statusin e Kosovës nuk do
të jetë ideale dhe pa rrezik, por ka shprehur bindjen se i dërguari i Kombeve të Bashkuara,
Marti Ahtisari do të dalë para Këshillit të Sigurimit me propozimin më të mirë të
mundshëm.