Një delegacion i Konferencës ipeshkvnore italiane viziton Tiranën.
(04.03.2007 RV)Ndonëse shekullarizimi e zakonet perëndimore ushtrojnë ndikimin
e tyre dhe në Shqipëri, ndjenjat fetare ndër të rinjtë vijojnë të jenë të fuqishme.
Kështu u shpreh pardje imzot Gjergj Frendo, ipeshkëv–ndihmës i Tiranë-Durrësit, gjatë
takimit me delegacionin e Konferencës ipeshkvnore italiane, që po viziton Ballkanin
për të promovuar “Agorën e të rinjve të Mesdheut” . Në Tiranë – shpjegoi Imzot Frendo
– vijnë studentë universitarë nga e gjithë Shqipëria, jetojnë ndër konvikte e shkojnë
në shtëpitë e tyre vetëm në fundjave. Por të dielën në darkë kthehen për të marrë
pjesë në takimet rinore. Për nevojat shpirtërore të të rinjve u shkëmbyen mendime
edhe me drejtorin e Karitasit, Tom Prekun, i cili theksoi se është shumë e rëndësishme
që shqiptarët, e sidomos të rinjtë, të kuptojnë si funksionon demokracia, sepse në
Shqipëri vijon mendësia e krijuar nga diktatura. T’u mësosh të rinjve praktikat
e mira, do të thotë ta shpejtosh zhvillimin dhe integrimin evropian - tha drejtori
i Karitasit, i cili e vlerësoi shumë “Agorën e Mesdheut” si rast të përshtatshëm për
shkëmbimin e mendimeve ndërmjet të rinjve të vendeve e të kulturave të ndryshme. Delegacioni
i KII u takua edhe me nuncin apostolik në Shqipëri, Imzot Giovani Bulaitis. - Në Shqipëri
mungon kleri vendas; më se 150 meshtarë humbën jetën në vitet e regjimit e sot shumica
e meshtarëve janë misionarë - pohoi Imzot Bulatis – e më pas foli edhe për marrëdhëniet
ndërmjet shtetit shqiptar, bashkësive fetare e sekteve, duke nënvizuar se mosnjohja
e veçantive të kishave të ndryshme, çon në situata paradoksale. E këtu prelati shpjegoi
se shtëpitë për të sëmurë, drejtuar nga rregulltaret, në nivel fiskal janë konsideruar
si hotele, me pretekstin se fitojnë, duke mos kuptuar se në këtë rast kemi të bëjmë
me një shërbim publik e jo me një aktivitet që ka për qëllim fitimin. Ekziston një
marrëveshje ndërmjet Kishës e shtetit, por zbatimi i saj praktik vijon të vështirësohet
nga funksionarët lokalë – shpjegoi imzot Bulaitis.