Bosnja e zhgënjyer mbi vendimin e Hagës për Serbinë, e pafajshme në masakrën e Srebrenicës
e lajme të tjera.
(27.02.07 RV)Udhëheqësit boshnjakë dhe kroatë në Bosnjë Hercegovinë shprehen
të zhgënjyer nga vendimi i Gjykatës së Hagës mbi Serbinë. Sipas këtij vendimi, Serbia
nuk është përgjegjëse e drejtpërdrejtë për gjenocidin në Bosnjë. Presidenti serb Boris
Tadiç kërkoi dje nga Parlamenti të dënojë vrasjet në Srebrenicë, por sot Partia e
kryeministrit Koshtunica nuk pranoi që kjo masakër të trajtohet si e veçantë, me një
deklaratë nga Parlamenti. Kujtojmë se masakra e Srebrenicës konsiderohet si tragjedia
më e madhe, që ka ndodhur në Evropë, pas përfundimit të Luftës II Botërore. Ndërkaq,
kryeprokurorja e Hagës, Karla Del Ponte i kërkoi Serbisë që të dorëzojë gjeneralin
Ratko Mlladiq, i cili besohet se fshihet në vend. “Edhe sot mund ta dorëzojnë po të
duan” – deklaroi Del Ponte.
Ambasadori italian dhe ai amerikan në Sri
Lankë janë plagosur lehtë nga një sulm i rebelëve Tamil kundër dy helikopterëve,
që transportonin edhe diplomatë të tjerë, ndër të cilët përfaqësuesi amerikan në vend.
Rebelët kanë shprehur keqardhje për ngjarjen, por kanë akuzuar qeverinë e Sri Lankës
se nuk i ka lajmëruar për kalimin e misionit ndërkombëtar, siç është bërë tashmë e
zakonshme. Bashkimi Evropian e ka dënuar sulmin, duke folur për një “incident të rëndë”
dhe i ka ftuar palët t’i japin fund luftës ndërmjet tyre.
Në Darfur
të Sudanit janë kryer krime lufte dhe kundër njerëzimit. Përgjegjësit duhen ndëshkuar.
Kjo është kërkesa e paraqitur nga Luis Moreno Okampo, prokuror i Gjykatës Penale Ndërkombëtare
të Hagës. Akuzohen ish-ministri i brendshëm sudanez, i cili është aktualisht ministër
i Ndihmës Sociale, dhe kreu i një milicie vendase. Sipas Kombeve të Bashkuara, në
Darfur, që nga viti 2003 kanë vdekur 200 mijë vetë dhe janë shpërngulur 2,5 milion
persona.