Kardinali Bertone: diplomacia vatikanase është në shërbim të së mirës së vërtetë të
njeriut.
(23.02.2007 RV)“Selia e Shenjtë
dhe Kisha nuk mbrojnë interesat e veta, por kërkojnë të mirën e vërtetë të njeriut”-
kështu u shpreh dje pasdite kardinali Tarçizio Bertone, sekretar i Shtetit të Vatikanit
në Institutin ‘Luigji Sturco’, ku u mbajt takimi me temë “Përfaqësitë diplomatike
të Selisë së Shenjtë, histori, studime e aktualitet”. Janë 177 kombet me të cilat
Selia e Shenjtë ka sot marrëdhënie diplomatike; 33 organizatat dhe organizmat ndërqeveritare,
pranë të cilave ka përfaqësi të përhershme, 10 ato zonale. Po cili është kontributi
konkret që i jep diplomacia vatikanase shoqërisë civile? Kardinali Bertone
përgjigjet: “Më duket se ajo që quhet diplomaci e Vatikanit, kontribuon me mjetet
e veta në dialogun dhe bashkëpunimin me bashkësinë civile, me autoritetet e saj, në
shërbim të së mirës së përgjithshme të njeriut, që është njëkohësisht anëtar i bashkësisë
civile dhe anëtar i Kishës. Interesat që mbron Kisha dhe Selia e Shenjtë nuk janë
në shërbim të vetvetes; kërkojnë vetëm të mirën e njeriut e të mbarë njerëzimit, duke
i mësuar, duke i shenjtëruar e duke i udhëhequr të pagëzuarit. E nga ana tjetër, duke
promovuarkudo atë të drejtë themelore, që është e drejta e lirisë fetare”. E
cilat janë detyrat e përfaqësive diplomatike të Selisë së Shenjtë? Imzot Antonio
Filipaci, autor i vëllimit “Përfaqësitë dhe përfaqësusit papnorë”, botuar nga
Shtypshkronja e Vatikanit, shpjegon: “Së pari, forcimi i lidhjeve ndërmjet Kishave
të veçanta dhe Papës së Romës, pra bashkimi ndërkishtar; e së dyti, theksimi i vlerave
të mëdha, që njerëzimi po përpiqet t’i mbrojë me të gjitha forcat, siç është paqja,
jeta, zhdukja e varfërisë dhe e urisë në botë e probleme të tjera, që nuk mungojnë
kurrë”. Po si u zhvillua në rrjedhë vitesh diplomacia papnore? Në mikrofonin
tonë, imzot Dominik Mambertì, sekretar i Vatikanit për marrëdhëniet me shtetet: “Diplomacia
papnore ka ndjekur evolucionin e bashkësisë ndërkombëtare, duke kaluar nga një diplomaci
kryesisht dypalëshe, në diplomaci shumpalëshe, dmth në përfaqësimin dhe pjesëmarrjen
në jetën e organizatave ndërkombëtare.Numri i nunciaturave apostolike dhe numri
i shteteve që kanë lidhje diplomatike me Selinë e Shenjtë ka ardhur duke u rritur,
posaçërisht pas rënies së Murit të Berlinit. Nga ana tjetër, prania e Selisë së Shenjtë
në gjirin e organizatave ndërkombëtare është zhvilluar shumë e, për këtë, mjafton
të citoj pjesëmarrjen në konferencat e mëdha të viteve ’90 mbi popullisnë e zhvillimin,
mbi kushtet e jetës së grave e, sidomos, në atë mbi zhvillimin shoqëror, në të cilën
Selia e Shenjtë mundi të bëjë të njohur më mirë Doktrinën Shoqërore të Kishës.