Papa Benedikti XVI i shpreh afërsi shpirtërore e mirëkuptim vëllazëror imzot Stanislao
Vielgush, pas dorëheqjes si ipeshkëv i Varshavës.
(22.02.2007 RV)Këtë e bën përmes një letre drejtuar prelatit polak, që mban
datën 12 shkurt. Letra u bë publike nga kardinali Jozef Glemp, primat i Polonisë,
në takimin e Këshillit të përhershëm të Konferencës ipeshkvnore, mbledhur pardje në
Varshavë, në vigjilje të Ditës së lutjes e të pendesës së klerit polak. Kjo ditë,
e caktuar nga ipeshkvijtë më 12 janarin e kaluar, pas dorëheqjes së kryeipeshkvit
të Varshavës, u kremtua dje me rastin e së Mërkurës së Përhime. “Misioni ipeshkvnor
sot, ashtu si në të kaluarën, nuk kryhet pa vuajtje” - i shkruan Papa imzotit Vielgush
i cili – kujtojmë - më 7 janarin e kaluar dha dorëheqjen nga detyra e kryeipeshkvit
të Varshavës, pasi mohoi e pastaj pranoi publikisht bashkëpunimin e tij me shërbimet
sekrete të regjimit të kaluar komunist. Në letrën e 12 shkurtit, si kujton rrethanat
e jashtzakonshme në të cilat imzot Vielgush kryente shërbimin e tij baritor, kur regjimi
komunist në Poloni përdorte të gjitha mjetet për të zhdukur çdo liri të qytetarëve
e në mënyrë të veçantë, të klerit, Benedikti XVI e fton prelatin të vijojë me besim
e qetësi veprimtarinë e tij në shërbim të Krishtit. E dje mbarë Polonia u lut
e bëri pendesë që shenjtëria e meshtarëve – ashtu siç kërkoi Papa në lutjen e Engjëllit
të Tënzot të së dielës së kaluar – t’i mbushë të gjithë besimtarët me shpirtin e faljes,
të pajtimit e të besimit reciprok. Sipas ftesës së ipeshkvijve polakë, dje në të gjitha
Kishat e vendit u kremtuan Meshë për faljen e gabimeve e të ligshtive në kumtimin
e Ungjillit.