Trashëgimia katolike e Kosovës është harruar nga plani i Ahtisarit. Flet ipeshkvi.

(19.02.07 RV) Vetëm dy ditë nga fillimi i negociatave mes Prishtinës dhe Beogradit diplomatë perëndimorë shprehen se presin sjellje konstruktive nga palet. NATO-ja dhe Bashkimi Evropian kanë bërë të ditur se procesi për statusin e Kosovës duhet të arrijë pa vonesa në fazën përfundimtare, sepse çdo vonesë mund të ketë pasoja në rritjen e tensioneve në Kosovë. Ndërkaq, zv.kryenegociatori për statusin e Kosovës, Albert Rohan, në një intervistë për gazetën vieneze “Korrieri”, ka deklaruar se nuk ekziston asnjë alternativë reale ndaj propozimit të të dërguarit të Kombeve të Bashkuara, Marti Ahtisari. Ndërsa, Ministri i jashtëm gjerman, Shtajnmajer mendon se Këshilli i Sigurimit i Kombeve të Bashkuara duhet të marrë vendim për Kosovën, edhe nëse shqiptarët e Kosovës dhe serbët nuk arrijnë zgjidhje gjatë bisedimeve për planin e Marti Ahtisarit. Edhe Kisha Katolike në Kosovë, ka opinionin e saj përsa i përket këtij plani. Kryeredaktori ynë, don David Gjugja foli për këtë me ipeshkvin e Kosovës, imzot Dodë Gjergjin. Ta dëgjojmë…
Ndryshime në hartën politike të Kosovës. Lidhja Demokratike e Kosovës, trashëgimtare e luftës politike të Ibrahim Rugovës, ndryshon emër. Pas ndarjeve që ndodhën në Kuvendin e gjashtë zgjedhor të saj, që sot ajo do të quhet Lidhja Demokratike e Dardanisë. Vendimi u mor dje në Konventën e parë zgjedhore të kësaj partie, ku kryetar u zgjodh Nexhat Daci, kandidati i vetëm i propozuar.


Zëvendëskomisari i policisë së Kombeve të Bashkuara për krime, Trygve Kalleberg, përkohësisht është emëruar në krye të policisë së UNMIK-ut. Në një komunikatë thuhet se ky emërim do të jetë në fuqi deri në emërimin zyrtar të Komisarit të policisë së UNMIK-ut nga Sekretari i Përgjithshëm në bazë të procedurave të zakonshme, të cilat priten të zgjasin disa muaj. Kalleberg do të zëvendësojë Stefën Kurtis, që dha dorëheqjen pas ngjarjeve të dhunshme të 10 shkurtit.