Në Engjëllin e Tënzot Papa theksoi: “Dashuria për armiqtë nuk është ‘taktikë’ por
thelb i mesazhit të krishterë.
(19.02.2007 RV)Dashuria për armiqtë
është e reja revolucionare që sjell Ungjilli. Në Lutjen e djeshme të Engjëllit të
Tënzot, Benedikti XVI foli për ‘armët’ e të krishterëve. Të krishterët – tha Papa
- duke luftuar kundër të këqijave të shoqërisë me armët e mirësisë e të drejtësisë,
mund t’ia dalin mbanesh t’ia ndryshojnë faqen botës pa zhurmë, pa strategji të posaçme
politike e ekonomike, por vetëm me besimin e patundur në mëshirën e pushtetshme të
Hyjit. Më pas i ftoi besimtarët të luten për shenjtërinë e meshtarëve polakë, të cilët
të Mërkurën e Përhime do të jetojnë një ‘Ditë lutjeje e pendese’ për gjithë klerin
kombëtar. Gjatë lutjes Papa bëri edhe thirrje për respektimin e të drejtave të
njeriut në Guine-Konakri, që këto ditë po tronditet nga tensione të forta të brëndshme.
“Dëshiroj t’i shpreh afërsinë time shpirtërore një vendi afrikan që po jeton
çaste vërtetë të vështira: Guinesë. Ipeshkvijtë e këtij kombi më kanë shprehur shqetësimin
e tyre për një situatë paralize shoqërore, me greva të përgjithshme e reagime të dhunshme,
që kanë shkaktuar viktima të shumta. Duke kërkuar respektimin e të drejtave njerëzore
e qytetare – theksoi Papa - siguroj se lutem që impenjimi i përbashkët për
të ecur në rrugën e dialogut të ndihmojë për kapërcimin e krizës”. Ta duash
armikun! T’ia kthesh edhe faqen tjetër, pasi të ka rënë shuplakë në njerën faqe! Kjo
është e reja që sjell revolucioni i krishterë. Një e re që shumkujt mund t’i duket
tepër e çuditshme, në mos po e papranueshme. Kjo e re shpesh interpretohet si shprehje
e butësisë, e një pacifizmi të ligshtë. Po ky shpjegim nuk ka të bëjë fare me kuptimin
e vërtetë të së resë ungjillore, e cila nuk e fton njeriun të dorëzohet para së keqes,
por t’i përgjigjet së keqes me të mirën. Duke pasur parasysh Ungjillin e djeshëm,
Benedikti XVI u ndal pikërisht tek njëri nga pohimet më themelore të Jezusit: “Duajini
armiqtë tuaj! Po pse – pyeti Papa - Jezusi i kërkon njeriut një dashuri, që i tejkalon
caqet e fuqive të tij? “Në të vërtetë, propozimi i Jezusit është realist, duke
pasur parasysh se në botë ka shumë dhunë, shumë padrejtësi e se kjo situatë nuk mund
të kapërcehet, në se nuk i kundërvemë pak më tepër dashuri, pak më shumë mirësi. Kjo
‘pak më tepër’ vjen nga Hyji: është mëshira e Tij, që u mishërua në Jezusin, e vetmja
forcë që mund ta kthejë botën e së keqes në rrugën e së mirës, duke nisur nga bota
e vogël e vendimtare, që është zemra e njeriut”. Me të drejtë – vërejti Benedikti
XVI – kjo faqe ungjillore konsiderohet ‘magna charta’ e mospranimit kristian të dhunës.
Në të duket e reja e Ungjillit, që e ndryshon botën pa bërë zhurmë. Ja – vijoi Ati
i Shenjtë – që këtu buron heroizimi i të vegjëlve që besojnë në dashurinë e Zotit
dhe e përhapin atë edhe me çmimin e jetës së tyre, duke coptuar kështu zinxhirët e
padrejtësisë: “Kuptohet, atëhere, se për të krishterët mospranimi i dhunës nuk
është sjellje taktike, por mënyrë e të qenit të njeriut që është i bindur për dashurinë
e Hyjit e për pushtetin e tij, që nuk ka frikë ta përballojë të keqen i armatosur
vetëm me armët e dashurisë e të vërtetësisë. Dashuria për armikun është bërthama e
‘revolucionit të krishterë’, revolucion që nuk bazohet mbi strategjitë e pushtetit
ekonomik, politik ose mediatik. Revolucioni i dashurisë, i një dashurie që nuk mbështetet
plotësisht mbi forcat njerëzore, por është dhuratë e Hyjit, fitohet vetëm duke ia
besuar vetveten pa asnjë kusht mirësisë së tij të mëshirshme”. Në përfundim
të lutjes, Ati i Shenjtë përshëndeti edhe disa vende të lindjes, duke shjeguar se
dje këto vende kremtuan me gëzim e në gjirin e familjeve vitin hënor. Të gjithë këtyre
popujve të mëdhenj – tha Papa – u uroj nga zemra paqe e begati.Së fundi Ati i Shenjtë
i ftoi besimtarët të pendohen në këtë kohë Krezhmësh e, duke ecur në gjurmët e Virgjërës
Mari, ta lëshojnë veten plotësisht në dorë të Zotit.