Serbët do të shkojnë në Vjenë për statusin e Kosovës.
(08.02.07 RV)Autoritetet
serbe do të dërgojnë një delegacion në Vjenë për të marrë pjesë në bisedimet për statusin
e Kosovës. Deklarata është e shefit evropian për politikën e jashtme, Havier Solana,
pas bisedimeve gjatë natës me autoritetet serbe në Beograd. Takimi mund të shtyhet
disa ditë, por jo më shumë. Presidenti serb, Boris Tadiç duhet t’i ketë dërguar sot
një letër, apo duhet t’i ketë bërë një telefonatë kryenegociatorit Ahtisari për t’i
komunikuar disponibilitetin serb. Përsa i përket qëndrimit ndaj propozimit të
Ahtisarit për statusin e Kosovës, serbët nuk kanë ndryshuar mendje. “Kanë përsëritur
se nuk do të pranojnë asgjë që të mos përmbahet në Kushtetutën e Serbisë dhe kjo kushtetutë
e sheh Kosovën si pjesë përbërëse të Serbisë”, sqaroi Solana. Ka të ngjarë që
Serbia të ketë marrë pëlqimin e Trojkës Evropiane për rifillimin e negociatave të
asociim-stabilizimit me Bashkimin Evropian, të ndërprera për shkak të mungesës së
bashkëpunimit me Gjykatën e Hagës. Zyrtarisht, kjo mundësi do të diskutohet në mbledhjen
e ministrave të jashtëm në Bruksel, të hënën e ardhshme.