Thirrje e Benediktit XVI drejtuar të rinjve për të mos e pranuar dhunën e për t’u
bërë ndërtimtarë të paqes.
(07.02.2007 RV)Sot në audiencën
e përgjithshme, kushtuar Akuilës e Prishilës, bashkëpunëtorë të Shën Palit Apostull,
Papa vuri theksin mbi rolin e vlerave të krishtera në familje. Audiencës së mbajtur
në Sallën e Palit VI në Vatikan, i parapriu takimi me shtegtarët e ardhur nga Lombardia,
ipeshkvijtë e të cilëve këto ditë vijojnë vizitën ‘Ad Limina’, mbledhur në Bazilikën
e Vatikanit. Në këtë takim Papa foli kryesisht për traditat fisnike familjare e fetare
të Lombardisë, por edhe për çastet e vështira që po kalojnë institucionet dhe agjensitë
edukative në një vend, ku ka sinjale shqetësuese dhe fenomene dhune e kriminaliteti,
që vërehen sidomos në jetën e të rinjve. Një realitet i tillë – nënvizoi Ati i Shenjtë
- duhet ta nxisë Kishën vendase për një hov të ri në misionin e saj kryesor, që është: “Të
kumtojë e të dëshmojë Ungjillin në çdo mjedis, posaçërisht atje ku vërehen tiparet
negative të kulturës konsumistike e hedonistike, të shekullarizmit e të individualizmit,
ku bien në sy forma të reja e të lashta të varfërisë me sinjale shqetësuese nga jeta
e të rinjve si dhe fenomene dhune e kriminaliteti. E gjërë është fusha e veprimit
tuaj – u tha Papa besimtarëve lombardë – nga njëra anë duhet mbrojtur e përhapur
kultura e jetës njerëzore dhe e ligjshmërisë, nga ana tjetër është i nevojshëm kthimi
më koherent personal e komunitar te Krishti”. Më pas, duke iu drejtuar ndihmësve
dioqezanë të veprimit katolik, Benedikti XVI foli për rëndësinë e edukimit të krishterë
të rinjve: “Të dashur miq, përballë emergjencës shqetësuese edukative, është
detyra juaj t’ua komunikoni fenë breznive të reja, duke nxitur takimin e shumë fëmijëve
e të rinjve me Krishtin. Mos u lodhni kurrë – edhe pse e vështirë, por tepër e nevojshme
e shumë e bukur – mos u lodhni, pra, kurrë s’u kujtuari atyre se vetëm Ungjilli mund
t’u përgjigjet plotësisht shpresave të zemrës njerëzore e mund të krijojë një humanizëm
të vërtetë”. Çastet e shumta të reflektimit për vështirësitë e universit rinor
u lidhen ngusht, si me një urë, me reflektimin për vlerat e pazevendësueshme të krishtera
e mbi familjen, si qendër natyrore për rrezatimin e tyre: “Çdo shtëpi mund të
shndërrohet në një Kishë të vogël, jo vetëm sepse në të duhet të mbretërojë dashuria
tipike kristiane, plot vetmohim e kujdes reciprok, por më tepër në kuptimin se gjithë
jeta famijare, e bazuar mbi fenë, duhet jetuar duke pasur Jezu Krishtin zot shtëpie”. Në
përfundim të audiencën me besimtarët lombardë në Bazilikën e Vatikanit, në përshëndetjen
drejtuar të rinjve, u ndje fuqimisht jehona e ngjarjeve të fundit dramatike italiane: “Të
dashur të rinj, të jeni kudo dëshmitarë të qëndrimit kundër dhunës e dëshmitarë të
paqes; e kjo ka rëndësi të veçantë pikërisht sot. Kontribuoni kështu për ndërtimin
e një ardhmërie më të mirë”. Një pohim i tillë ishte pasojë e katekizmit të
sotëm, gjatë të cilit Papa vuri theksin mbi vlerat e familjes të themeluar mbi vlerat
e fesë, simbol i së cilës janë bashkëshortët e krishterë Akuila e Prishila, përfaqësues
tipikë të shërbimit të laikëve në Kishë në kohët e para të krishterimit. Ishin dy
bashkëpunëtorë shumë të rëndësishëm të Shën Palit në apostullimin e tij – theksoi
Papa - dhe më pas kujtoi ngjarjet kryesore të jetë së Akuilës e Prishilës, bashkëshortë
që jetuan 40-50 vjet pas vdekjes së Krishtit. Benedikti XVI u foli mijëra besimtarëve,
mbledhur në Sallën e Palit VI në Vatikan, për një nga karakteristikat themelore të
bashkësive të krishtera të dhjetvjeçarëve të parë: mbledhjen e tyre në banesat e disa
familjeve, për të dëgjuar Fjalën e Zotit e për të kremtuar Eukaristinë. Kisha – pohoi
Ati i Shenjtë - lind pikërisht në shtëpitë e besimtarëve: “Një gjë është eqartë:
njëherësh me mirënjohejn e këtyre kishave të para, për të cilat flet Shën Pali, duhet
të theksojmë edhe mirënjohjen tonë, sepse falë fesë dhe impenjimit apostolik të besimtarëve
si Prishila e Akuila, krishtërimi arriti deri në breznitë tona. Nuk mund të rritej
vetëm nga apostujt, që e kumtonin, sepse për t’u rrënjosur në tokën e popullit, për
t’u zhvilluar gjallërisht, ishte i nevojshëm impenjimi i këtyre familjeve, i këtyre
bashkëshortëve, i këtyre bashkësive të krishtera; e kjo ka vlerë përgjithnjë, sepse
vetëm kështu rritet Kisha. Posaçërisht ky çift tregon sa e rëndësishme është veprimtaria
e bashkëshortëve të krishterë. Kur ata mbështeten në fe e në përshpirtëri, është i
natyrshëm, pastaj, edhe impenjimi i tyre në Kishë”.