U publikua mesazhi i Benediktit XVI për Ditën botërore të rinisë 2007.
(06.02.2007 RV)Të dashur të rinj,
mësohuni të doni ditë për ditë, siç bëri Jezusi, sepse vetëm dashuria që vjen nga
Hyji e shndërron zemrën e njeriut dhe nuk mbaron kurrë: këtë thekson Benedikti XVI
në mesazhin për Ditën botërore të rinisë 2007, që sivjet do të kremtohet në nivel
dioqezan. Mesazhi papnor ka për qëllim të gjallërojë në zemrën e të rinjve besimin
në dashurinë e vërtetë, besnike e të fuqishme, dashuri që kthehet në burim të paqes
e të gëzimit e që e bën njeriun dëshmitar të dashurisë. Me këto fjalë hapet mesazhi
i Atit të Shenjtë për Dbr-së 2007, e cila këtë vit, sipas traditës, do të kremtohet
në nivel dioqezan të Dielën e Larit, më 1 prillin e ardhshëm. Por, ta njohim
më hollësisht mesazhin papnor: “Të dashur të rinj, dëshiroj t’ju ftoj të merrni
guximin për të dashur, sepse dashuria është e forca e vetme që mund ta shndërrojë
zemrën e njeriut e të mbarë njerëzimit, duke i bërë të dobishme marrëdhëniet ndërmjet
burrave e grave, ndërmjet të pasurve e të varfërve, ndërmjet kulturave e qytetërimeve.
Është fjala për një dashuri që nuk duhet ngatërruar me ndjenjat njerëzore, të cilat
janë të paqëndrueshme. Prej tyre mund të krijohen mangësi ose më keq akoma, zhgënjime”. Ndjehet
qartë jehona e enciklikës “Deus caritas est” në faqet e mesazhit të Benediktit XVI
për Dbr-së 2007, prelud i takimit të madh botëror të Sidneit vitin e ardhshëm. “Sikurse
unë ju desha ju, ta doni edhe ju njëri–tjetrin” – është titulli i mesazhit të Papës.
Por – pyet menjëherë Ati i Shenjtë – a është e mundur të duash? Apo është utopi e
duhet t’i nënshtrohesh fatit, duke jetuar në një botë pa dashuri? Përgjigja që u jep
Papa të rinjve është ‘jo!’: dashuria e vërtetë, besnike dhe e fortë, ajo që i lidh
njerëzit, duke i bërë ta ndjejnë veten të lirë në respektimin reciprok, ekziston. Papa
e zhvillon reflektimin e vet në tre drejtime: në jetën e përditshme, në kërkimin e
ardhmërisë dhe në praninë e Kishës, duke sqaruar, më pas, edhe mundësitë për zbatimin
e parimeve shpirtërore në mjediset e jetesës të çdo të riu. Hyji – pohon Papa – është
e vetmja gurrë e dashurisë së vërtetë e misteri i Trinisë së Shenjtë është zbulesa
më e ndritshme e burimit të dashurisë. Por misteri i Hyjit-Dashuri i zbulohet njeriut
vetëm përmes Jezu Krishtit: është një dashuri pa kufi, dhuratë e plotë e vetvetes,
që Jezusi e dëshmon duke vdekur mbi Kryq. Duke shikuar Krishtin – u shkruan Papa të
rinjve – kuptohet sesi duhet dashur sipas Zotit. E duke kaluar nga lartësia e këtij
modeli, në jetën e përditshme, Ati i Shenjtë ndalet tek prirjet e të rinjve që përgatiten
për të ardhmen. Në se jeni të fejuar, Zoti ka një plan dashurie për ardhmërinë tuaj
bashkëshortore e familjare, prandaj është themelore që ju ta zbuloni këtë plan, me
ndihmën e Kishës, të lirë – vijon Papa – nga paragjykimi i përhapur, sipas të cilit
krishterimi, me urdhërimet e tij e me ndalesat e tija, krijon pengesa për gëzimin
e dashurisë dhe ndalon në mënyrë të posaçme shijimin e plotë të asaj lumturie, që
burri e gruaja e kërkojnë në dashurinë e tyre reciproke. Pastërtia në fejesë – shton
Papa - i krijon dashurisë kushte për të fituar pjekurinë e për të thelluar respektin
ndërmjet dy njerëzve që duhen, sepse dashuria e vërtetë nuk kërkon të përmbushë menjëherë
kënaqësinë e vet, as të sigurojë mirëqenien e vet. Benedikti XVI i fton të rinjtë
të luten, sepse lutja e ndriçon çdo njeri, si kur ecën në rrugën e jetës familjare,
ashtu edhe kur ia dhuron gjithë vetveten Zotit e të afërmit. Eukaristia – përsërit
Papa – është shkolla e madhe e dashurisë, sepse i krijon njeriut mundësitë të depërtojë
në zemrën e dashurisë së Zotit, duke i dhënë guxim të mos dorëzohet, por të ecë,
i patundur, në rrugën e Ungjillit. Po kufizohem të citoj këtu vetëm shembullin e Nënë
Terezës – u shkruan Papa të rinjve - e cila, për t’iu përgjigjur britmës së Zotit
“Kam etje!”, britmë që e kishte prekur thellë në shpirt- nisi të mblidhte njerëzit
që jepin shpirt nëpër rrugët e Kalkutës, në Indi. Që atëherë e vetmja dëshirë e jetës
së saj ishte të shuante etjen e Jezusit për dashuri, e jo me fjalë, por me vepra konkrete,
duke njohur fëtyrën e përgjakur Krishtit në kryq, plot etje për dashuri, në fytyrat
e të varfërve më të varfër. E Lumja Terezë vuri në jetë mësimin e Zotit: ”Çkado bëtë
për njërin ndër këta vellëzër të mi më të vegjël, e bëtë për mua” (Mt 25,40). E mesazhi
i kësaj dëshmitareje të përvujtë u përhap menjëherë në mbarë botën. Kështu, duke u
treguar të rinjve shembullin e shenjtorëve e posaçërisht të Nënë Terezës, Benedikti
XVI i porosit djemtë e vajzat që përgatiten të marrin pjesë në Dbr-së të Sidneit
2008: “Të dashur të rinj, zhvillojini talentet tuaja jo vetëm për të fituar një pozitë
shoqërore, por edhe për t’i ndihmuar të tjerët që të rriten. Zhvillojini aftësitë
tuaja, jo vetëm për t’u bërë më zotët e për të dhënë më shumë fryte, por kryesisht
për të qenë dëshmitarë të dashurisë.