Uisner në Kosovë e trojka evropiane në Moskë. Ravijëzohet politika ndaj Prishtinës.
(05.02.07 RV) Plani i Ahtisarit
është pranuar si pozitiv nga shqiptarët e Kosovës, por jo nga serbët e Beogradit.
Edhe Kisha ortodokse serbe ka deklaruar hapur se i dërguari i OKB-së nuk ka të drejtë
“t’u dhurojë” shqiptarëve diçka që i përket Serbisë. Sot, në Beograd janë mbledhur
krerët kryesorë politikë serbë, për të vendosur pikërisht mbi qëndrimin që duhet mbajtur
pas shpalljes së propozimit mbi statusin e Kosovës. Ndërkaq, i dërguari amerikan
për Kosovën, Frank Uisner është takuar me shqiptarët në Prishtinë. Ai ka shprehur
mbështetjen e Uashingtonit për planin dhe i ka kërkuar Rusisë të bashkëpunojë. Uisner
u shpreh se dokumenti mund të ndryshohet, përveçse në parimet bazë. “Ruajtja e integritetit
territorial është përshkruar qartësisht në dokument – theksoi ai në takimin me presidentin
e Kosovës, Sejdiu e autoritete të tjera. Kufijtë nuk do të ndryshojnë, dhe në këtë
pikë SHBA-të dhe anëtarët e tjerë të Grupit të Kontaktit janë të vendosur", tha Uizner,
duke bërë të qartë se nuk do të ketë ndarje të Kosovës. Ndërkaq, "Trojka" e Bashkimit
Evropian, të cilën e udhëheq shefi i diplomacisë gjermane, Frank Valter Shtajnmajer,
e ku bëjnë pjesë edhe përfaqësuesi i politikës së jashtme të BE-së, Havier Solana
dhe komisarja e punëve të jashtme Benita Ferrero-Valdner, ka biseduar sot në Moskë
me shefin e diplomacisë ruse Sergei Lavrov rreth çështjes së Kosovës. Lavrov ka përsëritur
qëndrimin e Rusisë, se zgjidhja për Kosovën varet nga Beogradi dhe Prishtina. Serbia
pret që Rusia të vendosë veton në Këshillin e Sigurimit të OKB-së, nëse plani për
Kosovën nuk i pëlqen Beogradit, por Moska ka mundësi të tregohet më pragmatiste dhe
të mos sillet ekzaktësisht siç dëshiron aleatja e saj në Ballkan.
Kryeministri
i Kosovës, Agim Çeku u ka bërë thirrje serbëve të Kosovës që ta pranojnë planin e
Kombeve të Bashkuara. Në një intervistë të botuar në gazetën beogradase "Glas Javnosti",
Çeku u ka dhënë siguri serbëve të Kosovës për trajtimin që do të kenë në të ardhmen,
por u ka kërkuar atyre të pranojnë realitetin. Sipas Çekut, serbët e Kosovës janë
të hutuar dhe në ankth për shkak të presioneve të mëdha nga ana e Beogradit.