Doktrina shoqërore e Kishës për zgjidhjen e problemeve të Azisë.
(25.01.07 RV) Të mbjellë në qytetërimet e mëdha aziatike një humanizëm të plotë,
solidar dhe të hapur ndaj trashendencës: ky është qëllimi i Kongresit kontinental
që filloi sot në Bangkok të Tajlandës, me një fjalim të kardinalit Renato Rafaele
Martino, president i Këshillit Papnor për Drejtësinë e Paqen. Sfidat e popujve
të Azisë janë të shumta. Kisha vë theksin mbi katër në veçanti: mbrojtjen e të drejtave
të njeriut, promovimin e zhvillimit, integritetin ambiental dhe impenjimin për paqen.
Sipas kardinalit Martino, këto sfida mund të përballohen duke përdorur parimet bazë
të doktrinës shoqërore të Kishës. E detyra kryesore e këtij Kongresi, që është i dyti
për Azinë, është pikërisht paraqitja e Përmbledhjes së Doktrinës Shoqërore të Kishës,
përcaktuar nga Papa Benedikti XVI si “mjet referimi autoritar për të frymëzuar krishtërisht
realizimin e një rendi të drejtë shoqëror”.