У панядзелак раніцай, 1-га студзеня, Папа Бэнэдыкт 16 адслужыў у Базыліцы Сьвятога
Пятра Сьвятую Імшу з нагоды 40-га Сусьветнага Дня Міру. Сваё пасланьне на Сусьветны
Дзень Міру, якое, дарэчы, мы ўжо пачалі перадаваць, Сьвяцейшы Айцец прыпомніў у казаньні
ў часе Сьвятое Імшы з нагоды урачыстасьці Божае Маці. Ён сказаў наступнае: у абліччы
пагрозаў міру, нясправядлівасьці, насільля, тэррарызму ды ўзброенных канфліктаў, якія
пастаянна працягваюцца, больш чым калі-небудзь дагэтуль трэба дзейнічаць супольна
ў карысьць міру. А гэты мір зьяўляецца адначасна дарам, якога трэба прасіць у часе
малітвы, ды заданьнем да адважнага і пастаяннага выконваньня яго. У прысутнасьці
Дыпламатычнага Корпусу акрэдытаванага пры Сьвятой Сталіцы, Папа спаслаўся да драматычнае
сітуацыі ў Сьвятой Зямлі. Маліўся, каб якнайхутчэй быў уведзены там мір і каб канчаткова
быў развязаны канфлікт, які працягваецца ўжо задоўга. “Мірнае пагадненьне, каб было
трывалым, мусіць прытрымлівацца пашаны годнасьці і правоў кожнага чалавека”- падкрэсьліў
Бэнэдыкт 16. “Перад прысутнымі
тут прадстаўнікамі многіў народаў я выказваю пажаданьне, каб міжнародная супольнасьць
спалучыла свае намаганьні і ў імя Бога будавала сьвет, у якім усе паважалі б асноўныя
правы чалавека”. Дадаў яшчэ, што каб так сталася, трэба аднак, каб фундамант гэтых
правоў быў прызнаваны не толькі ў звычайных чалавечых пактах, але ў самой натуры чалавека
і яго асноўнай годнасьці асобы створанай Богам. Таксама і ў разважаньні, перад
адгаварэньнем багародзічнае малітвы “Анёл Гасподні” ў панядзелак 1-га студзеня, Папа
Бэнэдыкт 16 гаварыў аб Сусьветным Дні Міру, які ўстанавіў Папа Павал 6-ы. Касьцёл ўшаноўвае
сёньня 40 Сусьветны Дзень Міру. Складаючы новагоднія пажаданьні да асобаў кіруючых
дзяржавамі і міжнароднымі арганізацыямі ды ўсіх людзей добрае волі, Папа Ратцынгэр
спаслаўся да тэмы Сусьветнага Дня Міру: “Чалавечая асоба ёсьць сэрцам міру. Сёньня
гаворыцца многа аб правах чалавека, але часта мы забываемся, што яны патрабуюць трывалага
фундаманту. А ім можа быць толькі годнасьць чалавечае асобы”- падкрэсьліў Сьвяцейшы
Айцец. Ды далей сьцвердзіў, што пашана гэтае годнасьці пачынаецца ад прызнаньня яе
праву да жыцьця і свабоднага вызнаваньня ўласнае рэлігіі. Накіруем нашую малітву
да Божае Маці, каб пастаянна ўзрасталі ў чалавечай сьвядомасьці сьвятая пашана да
кожнае чалавечае асобы ды рашучае адкіненьне вайны і насільля- падкрэсьліў Папа Бэнэдыкт
16.
Яшчэ ў нядзелю позным вечарам 31-га сьнежня Папа Бэнэдыкт 16 адслужыў у
Ватыканскай Базыліцы Сьвятога Пятра, вячэрню “Тэ Дэўм” ( Цябе Бога хвалім) на заканчэньне
2006 году. У сваёй прамове Папа сказаў, што званьне Багародзіцы прызнау Марыі Сабор
ў Эфэзе, які адбыўся ў 431-м годзе. Успамінаючы візіт у гэты горад Бэнэдыкт 16 падзякаваў
Божай Маці за спэцыяльную апеку ў часе ягонага паломніцтва ў Турцыю. Ейнаму мацярынскаму
заступніцтву Папа даручыў увесь сьвет, асабліва тыя сітуацыі, ў якіх толькі Божая
ласка зможа прынесьці суцяшэньне, прывярнуць мір і справядлівасьць. Пасьля вячэрні
Папа наведаў батлейку, што знаходзіцца на Плошчы Сьвятога Пятра. Там хвілінку памаліўся
ў маўчаньні. Затым увайшоў да гроты дзе зблізка змог лепш аглянуць мастацкія статуі
Сьвятой Сям”і і ўсю сцэну Боганараджэньня Ісуса Хрыста.