At Zef Pëllumbi, një nga personalitetet më të shquara të kulturës, ka rrëmbyer dje
çmimin e karrierës "Penda e Artë".
( 29.12.06 RV) At Zef Pëllumbi vlerësohet me “Pendën e Artë”! At Zef Pëllumbi,
një nga personalitetet më të shquara të kulturës, ka rrëmbyer dje çmimin e karrierës
"Penda e Artë". Juria e konkursit letrar kombëtar "Penda e Artë dhe e Argjendtë",
ka shpallur fituesit në gjininë e prozës, poezisë, përkthimit, studimit dhe letërsisë
për fëmijë. At Zef Pëllumbi është vlerësuar dje me çmimin letrar për rrëfimin e tij
vëllimor "Rrno për me tregue". Ministri i Kulturës, Bujar Leskaj, u shpreh se "vepra
monumentale e at Zef Pëllumbit "Rrno për me tregue", edukoi estetikisht dhe moralisht
letërsinë shqipe të këtyre viteve, njeriun që rrnoi vetëm për të treguar dhe për të
na ofruar historinë tjetër të shqiptarëve me një qasje letrare unike e në konture
filozofike, që e çojnë meditimin shoqëror në shkallë sipërore". Ndërkaq Pëllumbi është
shprehur se ky çmim i duket si kurora që i çohet në funeral pasi vdes. Me "Pendën
e Argjendtë" juria ka vlerësuar studiuesin e njohur nga Kosova, Sabri Hamiti, për
studimin më të mirë letrar, me titull "Tematologjia". Po me "Pendën e Argjendtë" për
prozën letrare më të mirë u vlerësua shkrimtari Zija Çela, me romanin "Las varrezas".
Ndërkaq "Penda e Argjendtë" për vëllimin poetik i është akorduar poetit Ali Podrimja.
Çmimet e tjera, si ai për përkthimin më të mirë nga shqipja në gjuhë të huaj, u janë
dhënë Mira Meksit dhe Marin Dobreskut për veprën e plotë të përkthyer në gjuhën rumune.
Ndërsa një tjetër çmim për letërsinë për fëmijë i është akorduar shkrimtarit Xhevat
Beqaraj. marre nga Gazeta Panorama 29 dhjetor 2006