Ipeshkvi i Ungros, imzot Erkole Lupinaçi, në vizitë ‘ad Limina’.
(15.12.2006 RV)Benedikti XVI priti sot paradite në audiencë grupin e dytë të
ipeshkvijve të Kalabrisë, në vizitë ‘ad Limina’. Ndërmjet tyre ishte edhe ipeshkvi
arbëresh i Ungros, imzot Erkole Lupinaçi. Kujtojmë se institucionet kishtare të arbëreshëve
në Kalabri nisën të organizoheshin që në kohën e Kuvendit te Arbërit (1703). Mënjëherë
pas tij, si në Kalabri, ashtu edhe në Sicili u themeluan dy seminare, të cilat patën
ndikim vendimtar mbi jetën kulturore, shpirtërore dhe kishtare të arbëreshëve. U emëruan
gjithashtu dy ipeshkvij, një për Kalabrinë dhe një për Sicilinë, gjë që ndikoi fuqimisht
për gjallërimin e ndërgjegjes etnike dhe fetare, duke siguruar kështu një mbështetje
të fortë për ruajtjen e identitetit të Kishës shqiptare në Itali. Për t’u njohur më
hollësisht me realitetin fetar, gjuhësor e kulturor të arbëreshëve të Kalabrisë, përgatitem
me këtë rast për faqen tonë të internetit skedën përkatëse, marrë me shkurtime nga
studimi i monsinjor Eleuterio Fortinos, zevendës-sekretar i Këshillit Papnor për nxitjen
e bashkimit të të krishterëve “Kisha ndër shqiptarët e Italisë; nga Kuvendi i Arbërit
(1703) tek Kuvendi i Arbëreshëve (2004) (hipoteza të punës për një Histori të Kishës
shqiptare në Itali).