Вясковая настаўніца Ганна Бачко не працавала на замежную выведку і не
агітавала вучняў супраць Саветаў. У спіс ворагаў народу яна трапіла за тое, што нарадзіла
айца Надсана – вядомага дзеяча беларускай эміграцыі. Амаль 30 гадоў назад Ганна Іванаўна
ціха сышла з жыцця, не пакінуўшы пасля сябе ні фотаздымкаў, ні лістоў, ні дакументаў.
Перад Дзядамі “Салідарнасць” (www.gazetaby.com) адшукала яе магілу ў Нясвіжскім раёне. Ніхто
не ведае, адкуль з’явілася ў Казлах маўклівая жанчына ў чорным паліто гарадскога крою
і белай пуховай хустцы (такіх у вёсцы ў тую пару яшчэ не бачылі) з рыпучай раскладушкай
у руках. “Пэўна, з Гарадзеі прыехала”, — мяркуюць вяскоўцы. — Па тым часе яе гардэроб
складаўся з вельмі прыстойнай вопраткі. Спадніцы і сукенкі даўжэй, чым заведзена было
насіць тады, — успамінае Раіса Карачун. Інтэлігентныя манеры, вытанчаныя, з пункта
погляду сельскіх модніц, уборы, “гарадская” мова, пільная ўвага да сціплай жанчыны
мясцовых чэкістаў — усё гэта спарадзіла ў вёсцы нямала чутак. Людзі пляткарылі, што
была настаўніца дваранкай па паходжанні і родам з Кранштата, што мелася ў яе “прыхаванае
золата” і што па сказаных ёю мімаходзь словах выходзіла, быццам лепшае віно, якое
калі-небудзь завозілі ў сельмаг, яна, падарожнічаючы ў юнацкасці з бацькам на караблі,
“вылівала за борт” — так шмат яго было. “Арыстакратка” зняла кут у Аляксандры Карачун.
У пакойчыку плошчай каля 25 квадратных метраў, з земляной падлогай. Руская печка з
“грубкай”, кухонная шафа, драўляны ложак, дзве вялікія лаўкі, стол і вялікі куфар
— вось і ўсё абсталяванне. Яшчэ — калаўрот, ходзікі на сцяне, фатаграфіі ў вялікіх
маляўнічых рамах і старое люстэрка. Электрычнасці не было. Толькі дзве газавыя лямпы.
Гаспадыня спала на печы, гаспадар – на ложку, кватарантка-настаўніца — на адной з
шырокіх лаваў. Куры ў моцныя маразы жылі тут жа, пад “прыпечкам”. — Вельмі добра
памятаю, як мяне спрабавалі навучыць прамаўляць літару “р”. Толку не было ніякага.
Заклікалі на дапамогу Ганну Іванаўну, — успамінае Ларыса, унучка Аляксандры Карачун.
— Яна паставіла мяне перад сабою, узяла за рукі, а далей — па плане: “Скажы “рыба”,
скажы “Лора”. Мяне да таго часу проста замучылі гэтай літарай “р”. Як прыйдзе хто
ў хату, адразу пачынае мяне мучыць. Але неяк у мяне не вельмі атрымоўвалася. Я ледзь
не плакала. А тут адразу і атрымалася. Захапленню не было мяжы. Праўда, потым я яшчэ
доўга замест “л” гаварыла “р”, і жанчыны жартавалі, што Ганна Іванаўна перастаралася. Потым
настаўніца перабралася жыць да адзінокай школьнай тэхнічкі — Фаны Фянчук. Парася трымалі,
хатнюю птушку. Як і ўсё ў вёсцы апрацоўвалі “дзялкі”, вылучаныя калгасам, сілкаваліся
з гароду. — Бедна яны жылі. Скромненька. Прыйшла я неяк. Настаўніца мые начоўкі
для парасяці. “Чаму вы, Іванаўна, рукі свае далікатныя не шкадуеце?” — кажу. А яна,
хоць і з адукацыяй чалавек, па гаспадарцы нароўні з тэхнічкай увіхалася, — гаворыць
Ганна Антановіч. Па расповедах аднавяскоўцаў, настаўніца, гатовая была кожнаму
дапамагчы, але людзей цуралася. Не сядзела адвячоркам, як заведзена ў вёсцы, на лавачцы,
не пляткарыла з суседкамі, нічога не распавядала аб сваім мінулым жыцці, аб радзіме.
Усё больш маўчала. — Мы ж ёй не роўня — чалавек з высокай адукацыяй. Хіба ж ёй
трэ было жыць, як нам? – і зараз разважае над гэтым пытаннем Ганна Антановіч. У
школе працавала нямала настаўнікаў, але такой павагай, як Ганна Іванаўна, у вёсцы
не карыстаўся ніхто. — Мой дзядуля Вінцусь быў вялікім аматарам пакурыць самасад.
Бабуля бурчэла на яго, але з хаты не выганяла. А калі прыходзіла Ганна Іванаўна, дзядулі
паліць катэгарычна забаранялася, — успамінае Ларыса Карачун. — Мне падабалася Ганна
Іванаўна. Яна прыносіла цукеркі-“падушачкі”. Да яе можна было прыціснуцца, а вопратка
ў яе пахла прыемна, не так, як у астатніх. Узімку калгаснікі сядзелі па хатах,
але часам бабулю выклікалі на працу. Тады чатырохгадовую Ларысу адводзілі ў школу
да Ганны Іванаўны. Школа была старая, у адным памяшканні займаліся ўсе чатыры пачатковыя
класы. Настаўніца давала заданне аднаму класу, потым іншаму. Ларысу ўсаджвалі за першую
парту. Ганна Іванаўна давала ёй кавалачак паперы і хімічны аловак. — І я вучылася
разам з астатнімі, — смяецца Ларыса. — І паперку сваю з крамзолямі, як і астатнія
вучні, здавала на праверку. На ўроках у Ганны Іванаўны заўсёды было ціха-ціха. Як
гэта ёй атрымоўвалася — розуму не прыкладу. Ад старой школы, у якой выкладала Ганна
Іванаўна, час не пакінуў і следу. На працу яна хадзіла “загуменнямі” — тыльным бокам
вуліцы, каб лішні раз не трапляцца людзям на вочы. Старалася жыць ціха і непрыкметна.
Мы абышлі з дзесятак хат у Казлах. Перагледзелі сямейныя альбомы яе вучняў у надзеі
знайсці хоць адзін здымак Ганны Іванаўны. Хоць бы на групавой фатаграфіі, якія звычайна
робяць для выпускнікоў. “Яна ніколі не фатаграфавалася, — растлумачылі нам. — Гэта
з-за сына”. Па адной з версіяў, якія існуюць у вёсцы, сын настаўніцы быў перакладчыкам
падчас акупацыі. Па іншай — святаром, які меў нейкія сувязі з немцамі і эмігрыраваў
за мяжу. Па трэцяй — і зусім эсэсаўскім лейтэнантам. — Ніякіх вестак яна ад яго
не атрымоўвала. Баялася штосьці высвятляць. Толькі душой адчувала, што жывы. І думала
аб ім да самой смерці. Стаяла на ўліку ў КДБ. За ёй назіралі. Увесь час жыла ў страху.
Нават пенсію адмаўлялася афармляць, каб лішні раз не нагадваць афіцыйным інстанцыям
аб сабе, — лічаць аднавяскоўцы. За кавалак сала дапамагала студэнтам-завочнікам
рабіць кантрольныя працы па нямецкай мове, для ўсёй вёскі пляла на замову нябачанай
прыгажосці карункі і палахліва адмахвалася ад тых, хто ўгаворваў яе падрыхтаваць патрэбныя
паперы: “Не трэба мне ніякай пенсіі”. Абы сыну не нашкодзіць. Органы не пакідалі
ў супакоі ні Ганну Іванаўну, ні аднавяскоўцаў. Выклікалі, дапытвалі: “Ёсць у вас настаўніца
Бачко? З кім мае зносіны? Хто да яе ў гасці прыязджае? Дзе яе сын?”. “Вы — КДБ,
вы і вынюхвайце”, — сказаў неяк у сэрцах адзін з суседзяў. На наступны дзень да
Ганны Іванаўны наведаліся госці у цывільным. Давялі яе да сардэчнага прыступу, з якім
настаўніца трапіла ў лякарню. “Мне добра, — у які раз пакорліва шаптала яна вернай
Фане. – Толькі бы Шурыка не чапалі”. …Калі памерла, развітваліся з Ганнай Іванаўнай
усёй вёскай. Вянок ад школы купілі. Як мае быць. Чалавека пахавалі. Фаня паставіла
ёй сціплы помнік. І толькі праз пятнаццаць гадоў высветлілася, што Шурык, якога Ганна
Іванаўна, як магла, засцерагала ад КДБ, — гэта айцец Аляксандр Надсан. Ніколі ён не
быў “эсэсаўскім лейтэнантам”. Зусім нават наадварот. Падчас вайны шаснаццацігадовага
Аляксандра разам з іншымі хлопцамі з Саюза беларускай моладзі сілай вывезлі ў Нямеччыну.
Потым ён апынуўся ў Францыі, дзе перайшоў на бок саюзнікаў па антыгітлераўскай кааліцыі
і ўступіў у войска генерала Андэрса. Ваяваў супраць фашыстаў у Італіі, а пасля вайны
вывучаў матэматыку ў Лонданскім універсітэце і тэалогію ў Грыгарыянскім універсітэце
ў Рыме. У 1958 годзе стаў уніяцкім святаром і зараз жыве ў Вялікабрытаніі. У 1990-х
гадах бацька Надсан прыязджаў у Казлы. Знайшоў Фаню Фянчук і магілу маці на могілках
у суседняй вёсцы Аношкі — у першым шырокім праходзе па левым баку. Год назад тэхнічку
Фаню пахавалі побач з настаўніцай Ганнай Іванаўнай. Фаіна Антонаўна не раз прасіла
аб гэтым пляменніцу. Нас на могілкі прывяла Ганна Антановіч, якую самотная настаўніца,
пазнаўшы, што яна аднаго года з яе Шурыкам, паўжартам, звала нявесткай. Цётка Анюта
ніколі не чула аб грамадскай дзейнасці айца Надсана і тым больш аб тым, што Ватыкан
афіцыйна зацвердзіў перакладзеныя ім на беларускую мову рэлігійныя тэксты для правядзення
літургіі для беларусаў-уніятаў ва ўсім свеце. Яна наўрад ці здагадваецца аб вялізным
значэнні для беларускай культуры створаных айцом Надсанам у Лондане бібліятэкі і музея
імя Францыска Скарыны. І нічога не ведае аб тым, што айцец Надсан, які ўзначальвае
створаны ў Вялікабрытаніі Беларускі камітэт дапамогі ахвярам радыяцыі, не раз дастаўляў
у Беларусь гуманітарныя грузы, лекі і медыцынскае абсталяванне. Але яна перакананая:
сын настаўніцы Ганны Іванаўны не можа быць здраднікам Радзімы. І не асуджае айца Надсана
за доўгую адсутнасць. — Хай ён не едзе і не хвалюецца. Мы даглядаем магілу. Ён
ні ў чым не вінаваты, нармальны чалавек, — гаворыць цётка Анюта і вядзе нас паглядзець
хату, дзе кватаравала Ганна Іванаўна. Дзверы зачыненыя на замок, скрозь пыльныя акенцы
нічога не бачна. А цётка Анюта раптам заводзіць расповед аб тым, як настаўніца гатавала
дзіўнае для вяскоўцаў блюда — пельмені. “Гэта сядзець, дзве гадзіны ляпiць, дзеля
таго, каб паесцi?! Не, я гэдак не магу…”, — шчыра здзіўляецца яна, нібы толькі што
пабывала ў Ганны Іванаўны ў гасцях. Трыццаць гадоў прайшло. Але хіба гэта тэрмін для
добрай памяці?