У Менску адбыўся Сімпозіум “Ян Павел ІІ – чалавек веры і культуры”, які быў арганізаваны
Мінска-Магілёўскай Архідыяцэзіяй у супрацоўніцтве з Канферэнцыяй Каталіцкіх Біскупаў
Беларусі. З гэтай нагоды Беларусь наведаў Прэфект Кангрэгацыі Каталіцкай адукацыі,
царкоўных і каталіцкіх школаў і ўніверсітэтаў Кардынал Зянон Грахалеўскі. Высокі
госць выступіў з рэфератам “Ян Павел ІІ – заканадаўца”, у якім падрабязна расказаў
аб тым вялізарным укладзе Папы Яна Паўла ІІ, у сусветную каталіцкую адукацыю, аб яго
плённай багаслоўскай і заканадаўчай спадчыне. Потым з рэфератам “Рымска-каталіцкі
Касцёл на Беларусі падчас пантыфікату Яна Паўла ІІ” выступіў Апостальскі Адміністратар
Пінскай дыяцэзіі Кардынал Казімір Свёнтэк. Яго Эмінэнца падрабязна расказаў аб кроках
аднаўлення Каталіцкай Царквы ў Беларусі, аб шляхах і дасягненнях гэтага перыяда. Далей
з рэфератам “Сувязі паміж паўсюдным і партыкулярнымі Касцёламі ў вучэнні і заканадаўстве
Яна Паўла ІІ” выступіў ксёндз прафесар Юзаф Крукоўскі. Галоўны рэдактар часопіса “Наша
вера” Крыстына Лялько ў рэфераце “Спадчына Яна Паўла ІІ на беларускай мове”, расказала
аб выдаўніцтве папскіх твораў па-беларускую. Біскуп Антоній Дзям‘янка, Апостальскі
Адміністратар Мінска-Магілёўскай Архідыяцэзіі прадставіў рэферат “Пантыфікат Яна Паўла
ІІ: святыя і благаслаўлёныя Беларусі”, а кандыдат навук, гісторык Алесь Жлутка працу
пад назвай “Ад апостала Андрэя да пантыфікату Яна Паўла ІІ: ключавыя этапы гісторыі
Касцёла ў Беларусі”. Прафесар, доктар філасофскіх навук, сястра Зофія Здыбіцка пазнаёміла
слухачоў з рэфератам “Разуменне чалавека ў філасофіі Яна Паўла ІІ”. На сімпозіуме
прысутнічалі: Апостальскі Нунцый у Беларусі Арцыбіскуп Марцін Відавіч, Біскуп Віцебскай
дыяцэзіі Уладзіслаў Блін, вікарны Біскуп Пінскай дыяцэзіі Казімір Вялікаселец, Апостальскі
візітатар для грэка-католікаў Беларусі Архімандрыт Сяргей Гаек, а таксама праваслаўныя
святары – прадстаўнікі Беларускага Экзархату Рускай Праваслаўнай Царквы, каталіцкія
святары з усіх беларускіх дыяцэзій. Сімпозіум “Ян Павел ІІ – чалавек веры і культуры”,
які праходзіў у Кафедральным касцёле Найсвяцейшай Дзевы Марыі, прыцягнуў да сябе ўвагу
многіх зацікаўленых. Па запрашэнні на ім прысутнічалі прадстаўнікі Міністэрства Адукацыі
Беларусі, прадстаўнікі Камітэту па справах рэлігій і нацыянальнасцяў, грамадзкіх уладаў,
а таксама журналісты з тэлебачання і перыядычных выданняў. Адбылася прэс-канферэнцыя
з удзелам Прэфект Кангрэгацыі Каталіцкай адукацыі, царкоўных і каталіцкіх школаў і
ўніверсітэтаў Кардынала Зянона Грахалеўскага. Па заканчэнні Сімпозіума адбыўся
канцэрт арганнай музыкі, пасля якога Кардынал Зянон Грахалеўскі разам з Кардыналам
Казімірам Свёнтэкам, ды іншымі пастырамі Каталіцкай Царквы ў Беларусі адслужылі Святую
Імшу аб хутчэйшай кананізацыі Слугі Божага Яна Паўла ІІ. Пасля заканчэння набажэнства
адбылася цэрымонія ўзнагароджання па выніках конкурсу, прысвечанаму Яну Паўлу ІІ,
а таксама урачысты канцэрт “Яну Паўлу ІІ прысвячаецца” у якім прынялі ўдзел майстры
мастацтваў Польшчы і Беларусі. Пад час візіту ў Беларусь Прэфект Кангрэгацыі Каталіцкай
адукацыі, царкоўных і каталіцкіх школаў і ўніверсітэтаў Кардынал Зянон Грахалеўскі
меў сустрэчу з намеснікам Міністра адукацыі Беларусі, а таксама, разам з Апостальскім
Нунцыям Арцыбіскупам Марцінам Відавічам і Апостальскім Адміністратарам Мінска-Магілёўскай
Архідыяцэзіі Антоніем Дзям‘янкам, наведаў Магілёў, дзе таксама меў сустрэчу з прадстаўнікамі
мясцовых уладаў.