Thirrje e Papës për paqe në Liban në audiencën e përgjithshme, e fundmja kushtuar
figurës së Shën Palit.
(22.11.2006 RV)Në audiencën e sotme
përgjithshme Papa u drejtoi një thirrje të fuqishshme gjithë libanezëve që të mos
lejojnë të fitojë urrejtja, por të forcojnë drejtësinë e pajtimin, në emër të së ardhmes
paqësore. Shtytjen për këtë thirrje Ati i Shenjtë e mori nga vrasja në Beirut e
ministrit libanez të industrisë, Pierr Gemaiel, udhëheqës i partisë kristiano-maronite,
duke iu drejtuar 50 mijë besimtarëve, që e kishin shndërruar Sheshin e Shën Pjetrit
në një qilim shumngjyrësh çadrash, për shak të shiut të rrëmbyer që nisi të bjerë
pa filluar ende audienca e përgjithshme e së mërkurës. E kjo i dha shkas Papës t’u
drejtohej të pranishëmve me fjalët, natyrisht jashtë tekstit zyrtar: “Shpresojmë se
Zoti do të bëjë të pushojë shiu”. Grupi më i madh i pranishëm ishte ai i besimtarëve
të ardhur nga dioqezat italiane e Abruceve e Molises, ipeshkvijtë e të cilave pikërisht
këto ditë janë në Romë për vizitën e tyre ‘ad Limina’. Papa arriti në Sheshin e Shën
Pjetrit me një makinë të zbuluar. Figura e tij e bardhë, pa ombrellë, në sa shiu vijonte
rrëmbyeshëm, u la një mbresë të thellë besimtarëve, të cilët e pritën me duartrokitje
të stuhishme e me brohoritje. E Papa shprehu dhimbjen e thellë për vdekjen e Pierr
Gemaielit, duke theksuar: “Nësa dënoj ashpër një atentat të tillë mizor, siguroj
se lutem e ndjehem shpirtërisht pranë familjes në zi dhe popullit libanez. Përballë
forcave të errëta që duan ta shkatërrojnë vendin, i ftoj të gjithë libanezët të mos
lejojnë të fitojë urrejtja por të fuqizojnë unitetin kombëtar, drejtësinë e pajtimin
dhe të punojnë së bashku për ndërtimin e një ardhmërie paqësore. I ftoj, së fundi,
udhëheqësit e vendeve që i kanë për zemër fatet e kësaj zone, të japin ndihmesën e
tyre për një rrugëzgjidhje globale, e cila i jep fund situatave të padrejtësisë që
vërehen prej vitesh”. Në katekizmin e audiencës së sotme, Papa mori simbolikisht
udhën e Damaskut, ku ndodhi kthimi i Shën Palit, me rëndësi të dorës së parë për të
kuptuar lidhjen mistike që bashkon Krishtin me Kishën. Apostulli i ardhshëm – shpjegoi
Benedikti XVI – nuk u kthye, ashtu si të tjerët, në takim me bashkësinë e krishterë,
të cilën madje e persekutoi. U kthye me nismën e vetë Krishtit, që iu duk si i persekutuar.
Shën Pali u kthye njëkohësisht tek Krishti e tek Kisha. “Kështu arriti tek
përkufizimi origjinal i Kishës si Korpi i Krishtit, të cilin nuk e gjejmë tek autorët
e tjerë të krishterë të shekullit të parë. Rrënjën më të thellë të këtij përkufizimi
mahnitës të Kishës e gjejmë tek sakramenti i Korpit të Krishtit. Thotë Shën Pali:
“Duke qenë një bukë e vetme, ne, megjithëse shumë, jemi një trup i vetëm”. Prandaj
Apostulli i Popujve – vijoi Benedikti XVI - nuk i deshi kishat që themeloi, të ftohta
e burokratike, por plot ndjenjë e pasion, sepse i konsideronte si shtrirje të pranisë
personale të Krishtit në botë. Themelonte, kështu, një Kishë të përbërë nga gjymtyrë
të bashkuara e njëkohësisht të dalluara, të cilave u printe fryma e Shpirtit Shenjt”: “Natyrisht
të nënvizosh kërkesën e unitetit nuk do të thotë se duhet rrafshuar ose sheshuar jeta
kishtare sipas një mënyre të vetme veprimi. Gjetiu Pali mëson të mos shuhet Shpirti,
domethënë të krijohet hapësira për gjallërinë e pabesueshme të shfaqjeve karizmatike
të Shpirtit Shenjt, që është burim energjie e gjallërie përherë të re”. Kemi
të bëjmë, pra, me një bashkim si vertikal, ndërmjet Jezusit e besimtarëve, ashtu edhe
horizontal, ndërmjet të gjithë atyre që luten në emër të Zotit tonë Jezu Krishtit.
Mbledhjet tona liturgjike duhet të jenë të tilla, sa ta shtyjnë njeriun që, pa qenë
i krishterë, merr pjesë ndër to, të thotë në fund me bindje: “Zoti është me ju!”.
Kuptohet lehtë prandaj – shtoi Papa – sa e madhe është dëshira për ta realizuar atë
që uron Shën Pali. Në fund të audiencës Ati i Shenjtë përshëndeti grupet e ndryshme
në shumë gjuhë dhe i ftoi të kujtojnë figurën e Krishtit Mbret, që do të kremtohet
të dielën e ardhshme, festë me të cilën përfundon Koha e zakonshme liturgjike, për
t’i hapur rrugën Kohës së Ardhjes.