Прэзідэнт Францыі прысвоіў Кардыналу Казіміру Свёнтаку званне камандора ордэна Ганаровага
легіёна.Шчыра віншуем і ганарымся ўсе мы - беларускія католікі ў Беларусі і па цэлым
свеце!
Ордэн Ганаровага легіёна - вышэйшая вайсковая і грамадзянская ўзнагарода Францыі.
Яна была заснавана Напалеонам Банапартам у 1802 годзе. У маі 1998 года ордэна ўдастоены
кардынал Йозеф Ратцынгер, які цяпер ёсць Папам Рымскім Бенедыктам XVI. "Узнагарода
прысуджана чалавеку, які ў вачах французаў увасабляе сабой гісторыю беларускага народа
апошніх сямідзесяці гадоў"- патлумачана з арцыдыяцэзіі. Афіцыйная цырымонія ўзнагароджання
Кардынала Казіміра Свёнтака знакамі высокага вызначэння камандора ордэна Ганаровага
легіёна адбылася 23 лістапада ў рэзідэнцыі пасла Францыі ў Беларусі. У ходзе цырымоніі
патрыярху беларускай каталіцкай Царквы павязана пунсовая стужка з залатым крыжам камандора.
У адказ на урачыстыя словы словы спадара Пасла Стэфана Шмялеўскага кардынал Казімір
Свёнтак адказаў па-фрацузску: « Спадар Пасол, высокую ўзнагароду, якой
сёння мяне адзначае Французская Рэспубліка, я прымаю з такім самым пачуццём, з якім
яна была нададзена: як сведчанне павагі і прызнання беларускаму народу і яго лёсу.
Прашу Вас перадаць Пану Прэзідэнту Французскай Рэспублікі выраз маёй удзячнасці і
глыбокай павагі, якая мяне напаўняе за праяўленую ім мудрасць.Беларускі народ, які
ён ушаноўвае праз мяне, за сваю мужнасць і годнасць, з якімі ён намагаўся ўчора і
імкнецца сёння выжыць як асобная нацыя, сапраўды дастойны падтрымкі і захаплення,
якімі Францыя так шчодра яго надзяляе. Што датычыцца мяне, я ўдзячны Пану Богу за
тое, што Ён даў мне ласку такога доўгага жыцця як у добрыя, так і ў дрэнныя дні, сярод
гэтага народа, які ніколі мяне не расчароўваў».