Kuvendet dhe eremitazhet e klauzurës janë të domosdoshme për njeriun e sotëm, ashtu
si ‘mushkëritë’ e blerta të një qyteti: u bëjnë mirë të gjithëve. Këtë theksoi Benedikti
XVI dje në lutjen e Engjëllit të Tënzot.
(20.11.2006 RV) Papa foli dje për vlerën e lutjes në heshtje e në fshehtësi,
me rastin e Ditës ‘pro Orantibus’, kushtuar kujtimit të bashkësive rregulltare të
klauzurës, që ia kushtojnë gjithë jetën lutjes në kuvendet e tyre vetmitare. Kjo ditë
do të kremtohet nesër, njëherësh me përkujtimin e Paraqitjes së Marisë në Tempull.
Dhjetra-mijëra besimtarë e turistë ishin të pranishëm dje në Sheshin e Shën Pjetrit,
ndriçuar nga rrezet e ngrohta të diellit që të kujtonte më shumë një mbarim pranvere
se sa fundin e vjeshtës së dytë. Kuvendet dhe vetmitoret e klauzurës u bëjnë mirë
të gjithëve – shpjegoi Benedikti XVI, duke i nxitur besimtarët ta falënderojnë Zotin
për dhuratën e njerëzve të shumtë, të cilët i kushtohen plotësisht Zotit në lutje,
heshtje e fshehje. Por ndokush pyet – vijoi Papa – ç’kuptim e ç’vlerë mund të ketë
prania e tyre në kohën tonë, përballë situatave të shumta e urgjente të varfërisë
e të mjerimit? “Pse ‘të mbyllen’ përgjithmonë ndërmjet mureve të një manastiri
e t’i lënë të tjerët pa ndihmesën e aftësive e përvojave të fituara? Ç’fryt mund të
ketë lutja e tyre për zgjidhjen e problemeve të shumta konkrete, që vijojnë ta trondisin
njerëzimin”. E pra jeta tregon - vërejti Ati i Shenjtë – se shumë njerëz,
duke i çuditur miqtë e dashamirët, braktisin karrierat profesionale shpesh premtuese,
për të ndjekur rregullin e manastirit të klauzurës: “Ç’ gjë tjetër i shtyn të
bëjnë një hap kaq impenjativ, veç faktit se e kanë kuptuar që, siç mëson Ungjilli,
Mbretëria e qiellit është ‘thesar’ për të cilin ia vlen të braktisësh gjithçka?”. Në
se Shën Tereza e Avilës shkruante “Gjithçka kalon, po Zoti nuk ndryshon”, këta vëllezër
e motra dëshmojnë – shtoi Benedikti XVI – se në mes të ngjarjeve të përditshme, nganjëherë
edhe të ethshme, e vetmja mbështetje që nuk lëkundet kurrë, është Zoti, shkëmbi i
pathyeshëm i besnikërisë dhe i dashurisë. E ja se përballë nevojës që kanë shumë njerëz
për të shpëtuar nga rutina e përditshme e qyteteve të mëdha, në kërkim të hapësirave
të volitshme për heshtje e meditim, kuvendet e jetës kundruese u ofrohen si oaza në
të cilat njeriu, shtegtar mbi tokë, mund të shuajë më mirë etjen në burimet e Shpirtit. “Prandajkëto vende, në dukje të panevojshme, janë në të vërtetë të domosdoshme, si mushkëritë
e blerta të një qyteti: u bëjnë mirë të gjithëve, edhe atyre që nuk i shkelin kurrë
ose që nuk e dinë fare se ekzistojnë”. Prej këndej Papa kërkoi që këtyre bashkësive
të mos u mungojë kurrë ndihma shpirtërore e materiale. Së fundi Benedikti XVI,
gjatë përshëndetjeve në gjuhë të ndryshme pas lutjes së Engjëllit të Tënzot, kujtoi
posaçërisht viktimat e aksidenteve në rrugë dhe familjet e tyre, në sa dje kremtohej
Dita botërore kushtuar këtij realiteti dramatik.