(19.11.2006 RV)Përfundoi sot Festivali
V i muzikës dhe i artit kishtar në bazilikat patriarkale të Romës, që nisi të mërkurën
e kaluar. U organizua nga Fondacioni ‘Pro musica sacra’ me rastin e 500-vjetorit të
vënies së gurit të parë të Bazilikës së Vatikanit. Ndërmjet grupeve pjesëmarrëse,
kujtojmë Korin e Akademisë filarmonike romake dhe Viner Filarmoniker, e cila për
herë të tretë në historinë e vet, shoqëroi sot kremtimin e Eukaristisë në Bazilikën
e Shën Pjetrit në Vatikan me Meshën e Kurorëzimit në do maggiore K. 317 të Volfgang
Amadeo Mozart. Pas përfundimit të Meshës besimtarët e shumtë që kishin mbushur
përplot bazilikën, ndoqën lutjen e Engjëllit të Tënzot në Shehin e Shën Pjetrit. Ditë
historike 14 nëntori në rrugën ekumenike: për herë të parë u mblodhën së bashku në
Lids ipeshkvijtë katolikë të Anglisë e të Galesit me ipeshkvijtë anglikanë. Përkujtuan
40-vjetorin e vizitës së kryeipeshkvit të atëhershën të Këntërbërit Majkëll Ramsei,
që u prit në audiencë nga Pali VI. Kjo vizitë në Vatikan, menjëherë pas Koncilit II
të Vatikanit – që shënonte një etapë historike në dialogun ekumenik, do ngjallte shpresa
të mëdha për bashkimin e plotë të gjithë të krishterëve e do të sillte, në vitet që
do të vinin, fryte pajtimi doktrinor e baritor. Takimi në Lids të Anglisë do
të pasohet nga vizita e Primatit anglikan, Uiljams, më 23 nëntorin e ardhshëm në
Vatikan, ku do të takohet me Benediktin XVI.
Kryeipeshkvi anglikan i Jorkut,
Xhon Sentamu, denoncon mungesën e skenave të lidhura me Lindjen e Krishtit në pullat
e emetuara nga postat britanike për Krishtlindje. Sipas prelatit, kemi të bëjmë me
një konfirmim të ri të përpjekjeve për ta thelluar zbehjen e kristianizmit në zemrat
e njerëzve. Ipeshkvi njofton edhe se shumë përfaqësues të qeverisë, me rastin e Krishtlindjes,
nuk shkëmbejnë më kartolina me urimin “Për shumë vjet Këshndellat”. Këtë urim tradicional
të krishterë e kanë zevendësuar me ‘Urime për festat’. E një përpjekje e tillë për
ta zbehur ndikimin e krishterë është vërejtur edhe në raste të tjera. Është hequr
- për shembull – sqaron ipeshkvi – kryqi nga një kremator i Plimuthit si dhe një vend
parkimi makinash falas, për besimtarët që ndjekin Meshën shenjte të dielave.
“Shën
Agostini njeri i dialogut e urë që lidh kulturat e ndryshme”: ky është mesazhi i shtegtimit
të Pishtarit, që u ndez më 23 tetor në Algjeri, ku lindi Shenjti dhe
arriti më 12 nëntor në Pavi të Italisë. Pishtari, simbol i takimit ndërmjet
qytetërimeve, njihet edhe si vravashka e dialogut. Në vitin kur Urdhëri Agostinian
kremton 750-vjetorin e themelimit, Pishtari i Shën Agostinit rrezaton dritë kudo që
ka grindje e konflikte, me shpresë që njerëzit ta kuptojnë se dialogu është guri i
themelit për ndërtimin e paqes.
“Kemi ardhur për të të adhuruar, Jezus!”.
Kjo është lutja e përsëritur nga disa dhjetra-mijëra njerëz, që morën pjesë këto ditë
në procesionin eukaristik, kremtuar në Shillong, në Indinë lindore. Në procesion
morën pjesë 60 mijë katolikë, që e ndoqën të Shenjtnueshmin Sakrament vendosur mbi
një qerre të zbukuruar me lule, ndërsa mijëra të tjerë e përshëndetën anës rrugëve
kalimin e Eukaristisë. Ngjarja tepër prekëse, u transmetua edhe nga televizioni vendas.
Kjo dëshmi shprese, që u dha Zoti i ngjallur besimtarëve, është shenjë positive. Tregon
se jeta e njerëzve mund të ndryshojë në se venë në themel të saj dashurinë e faljen,
duke pasur gjithnjë parasysh fjalët e Krishtit në kryq: “Fali, o Atë, se nuk e dinë
çfarë bëjnë!”. Në Havier të Spanjës të enjten e kaluar përfundoi
takimi “Françesk Saveri. Rikthim, takim, mision e impenjim për një jetë të denjë e
për drejtësi”. Organizatore ishte provinca jezuite e Lojolës në bashkëpunim me disa
organizata të tjera të Shoqërisë së Jezuitëve. Gjatë takimit folën shumë jezuitë e
laikë të impenjuar në veprimtari të asistencës për të sëmurët me Sidë, për njerëzit
e braktisur, për fëmijët viktima të dhunës e sidomos, për emigrantët. Në
mbledhjen plenare të ipeshkvijve indonezianë, që u mbajt gjatë kësaj jave, u
vu theksi mbi temat e ekonomisë dhe të drejtësisë shoqërore. U fol edhe për problemet
ndërkombëtare të globalizimit e të varfërisë, lidhur ngusht me realitetin e Indonezisë.
Në letrën baritore, publikuar në përfundim të takimit, theksohet se Kisha është
e thirrur të marrë mbi vete përgjegjësinë që i takon në gjirin e shoqërisë, të tregojë
udhën në të cilën duhet ecur e të punojë gjithnjë e me të gjitha forcat për të mirën
e përbashkët.
Në Çad, e posaçërisht në kryedioqezën e N’Djamenës, mësimi
mbi Islamin bën pjesë në programin e formimit të katekistëve katolikë . E kjo, sepse
më shumë se gjysma e banorëve të vendit janë myslimanë e sepse nuk mungojnë kthimet
e të krishterëve në Islam, shoqëruar edhe me tensione, si ato të vitit 1979, që shkaktuan
mijëra viktima.
“Do të jeni dëshmitarët e mi deri në skajet më të largta të
tokës, për ta çuar kudo fjalën time e për t’i mbledhur bijtë e Zotit kudo që janë”-
kjo është tema e Kongresit misionar të Afrikës Lindore, që përfundoi sot në Burkina
Faso. Në mesazhin drejtuar Kongresit nga kardinali Ivan Dias, prefekt i Kongregatës
për Ungjillëzimin e Popujve theksohet: “Detyra më e rëndësishme për kryerjen me sukses
të veprimtarisë misionare, është formimi i personelit apostolik.