Mesazh i Benediktit XVI për Ditën botërore të emigrantit 2007: të respektohen dinjiteti
dhe të drejtat e emigrantëve, posaçërisht të familjeve në mërgim.
(14.11.2006 RV) Udhëtime, ose më
mirë të themi ikje, në kërkim të një jete më të mirë, që bëhen pastaj kurthe vdekjeje.
Ky është epilogu i historisë së shumë familjeve të emigrantëve, që kërkojnë në mërgim
një ardhmëri të re, në sa u mungon rrjeti i përshtatshëm i mbrojtjes, që duhet t’u
garantojë sidomos të drejtën më fillestare, atë të mbijetesës. “Familjes mërgimtare”
i kushtohet Dita botërore e emigrantit dhe e refugjatit, që do të kremtohet më 14
janar 2007. Benedikti XVI, në Mesazhin e rastit, flet për kërkesat njerëzore e shpirtërore
të emigrantëve e njëkohësisht denoncon shkeljet që vërehen në përpjekjet për të zgjidhur
problemin e ndërlikuar të emigracionit. Mesazhi u paraqit sot paradite në Sallën e
Shtypit të Vatikanit nga kryesia e dikasterit përkatës të Selisë Apostolike. Eshtë
një dramë e lashtë ajo që e ushqen me shpresë emergjencën moderne të emigracionit:
ikja e familjes së Nazaretit në Egjipt. Benedikti XVI e hap Mesazhin e tij për Ditën
e 93-të botërore të emigrantit e të refugjatit me bindjen se Jozefi, Maria e Jezusi,
që u detyruan të mërgojnë, janë model, shembull dhe mbështetje për të gjithë emigrantët,
shtegëtarët e refugjatët që, të shtyrë nga persekutimi ose nga nevoja, detyrohen të
braktisin vatrat e tyre, të largohen nga atdheu, nga të dashurit, të afërmit, miqtë
drejt viseve të huaja. Prerje e lidhjeve familjare, shpërdorime nga ana e organizatave
që sundojnë tregun e skllevërve të rinj, integrim i ndërlikuar në vendet ku synojnë
të gjejnë një jetë më të mirë. Këto janë rreziqet tipike para të cilave ndodhet njeriu
që zgjedh ose shtrëngohet të ndjekë rrugën e mërgimit. Është një front jashtzakonisht
i gjërë, në të cilin Kisha përpiqet të luftojnë gjithnjë me armën e solidaritetit. Sekretari
i Këshillit Papnor për Baritorinë e Emigrantëve, kryeipeshkvi Agostino Marketo, solli
në konferencën e shtypit organizuar me këtë rast, disa shifra përmes të cilave mund
të përceptohen përmasat e përgjithshme të fenomenit, por edhe hollësitë e tragjedive
individuale që e përbëjnë. Sot Komisariati i Lartë i OKB-së ndihmon 20 milion vetë
– 9 milion nga të cilët janë refugjatë. 4 milonë janë vetëm palestinezët që asistohen
nga Agjensia e OKB-së, ndërsa në Jug të botës vijojnë të jetojnë ndër kampe refugjatësh
9 milionë të shpërngulur nga vatrat e tyre. Imzot Marketo përshkroi gjendjen e një
familjeje tipike, që jeton në këto kampe, ku në rend të ditës janë ushqimi i keq,
mungesat e të gjitha natyrave e zhgënjimet psikologjike: “Të mbash familjen
në kushte të tilla është e vështirë, me ndikim të madh e të rëndë mbi pjestarët e
me pasoja negative në marrëdhëniet e saj të brëndshme. Ky ndikim bëhet edhe më i rëndë,
kur fëmijët e gratë detyrohen të pranojnë shfrytëzimin seksual, duke e kthyer në mjet
mbijetese. Papa e kujton këtë dramë në mesazhin e tij, në paragrafin 4. Në këto kushte,
kryetarët e familjes ndjehen të pafuqishëm e të fyer, sepse nuk janë të zotët të sigurojnë
as mjetet më fillestare të jetesës për të dashurit e tyre. Shpesh vajzat mbeten shtatzëna
vetëm për të siguruar një copë sapuni ose një copë buke për të shuar urinë. Gjithë
kjo e shkatërron jetën familjare, duke krijuar kushte të tilla jetese, në të cilat
veprimtaria e strukturave shoqërore e ka të vështirë të ndikojë, në sa njerëzit humbasin
vlerat, humanitetin e dinjitetin e tyre. Prej këndej refugjatët, në mënyrë të natyrshme,
dëshirojnë diçka më tepër se strehimi: dëshirojnë të punojnë e të kontribuojnë për
mirëqenien e shoqërisë që i strehon, gjë që i ndihmon edhe të integrohen”.
Për të favorizuar integrimin, Benedikti XVI inkurajon ratifikimin e Konventës ndërkombëtare
2003, që mbron të drejtat e punëtorëve emigrantë, si dhe marrjen e masave ligjore
e shoqërore nga ana e qeverive. Në rast të mungesës së tyre, familjet e shtypura nën
barrën e vështirësive të integrimit, përdorin mekanizmat e tyre të mbijetesës, që
pengojnë zhvillimin e harmonishëm. Duhen inkurajuar njerëzit e shkatërruar shpirtërisht
ta rifitojnë besimin në vetvete – thekson Benedikti XVI dhe vijon: Duhet pastaj edhe
impenjimi që të garantohen të drejtat dhe dinjiteti i familjeve dhe t’u sigurohet
një strehë në përkim me kërkesat e tyre. Ndërkaq nga refugjatët duhet kërkuar të sillen
mirë në shoqërinë e re që i strehon. Papa i porositë kishat vendase të punojnë në
të gjitha fushat baritore, përfshirë edhe atë të studentëve të huaj – duke pasur parasysh
porosinë e Shën Palit: “Caritas Christi urget nos”, “Dashuria e Krishtit na nxit”.
Këtë theksoi edhe kryetari i dikasterit të Vatikanit, kardinali Renato Rafaele
Martino: “Shoqëria civile dhe bashkësia e krishterë duhet t’i kenë mirë
parasysh problemet e ndërlikuara dhe vështirësitë, por edhe vlerat e burimet e këtij
realiteti të ri shoqëror. Kjo kërkon zhvillimin e marrëdhënieve, të cilat nga njëra
anë kthehen në ndihmë për përfshirjen në shoqëri, e nga ana tjetër, në raste për zhvillimin
personal, shoqëror e fetar, për të krishterët, bazuar mbi respektimin e ligjeve, mbi
takimin e kulturave e të feve e mbi respektimin reciprok të vlerave, që kanë në themel
të drejtat e njeriut. Në këtë mënyrë e Drejta ndërkombëtare duhet të synojë ta mbrojë
bashkimin familjar e ta luftojë fenomenin gjithnjë më të përhapur të bashkimeve të
faktit, dmth të krijimit të familjeve të parregullta, pasojë e vështirësive për bashkim
ligjor, për shak të procedurës së gjatë burokratike të sigurimit të këtij bashkimi.Në
vijim të konferncës së shtypit, duke u dhënë përgjigje pyetjeve të gazetarëve, u përballuan
probleme të ndryshme, që nga muri që duhet të ndajë kufirin e SHBA nga Meksika, i
cili konsiderohet çnjerëzr nga ipeshkvijtë e të dy vendeve – tek ndërhyrja e mundshme
e bashkësisë ndërkombëtare ndër zonat në krizë të Planetit.