Bush në Azi në mbledhjen e APEC-ut; Hamas nuk do ta njohë shtetin e Izraelit.
(14.11.06 RV)Presidenti amerikan Bush u nis sot për në Azi, në një turne që
do ta çojë në Singapur, Vietnam dhe Indonezi. Do të marrë pjesë në mbledhjen e Apekut
(Shoqatës për Bashkëpunimin Ekonomik ndërmjet Azisë dhe vendeve të Paqësorit), e cila
do të zhvillohet në fundjavë në Hanoi. Për Bushin, që nuk ka qenë kurrë në Vietnam,
sepse kur duhej të shkonte si ushtar gjeti një pretekst për të mos u nisur, kjo vizitë
bie në një moment të vështirë: gjendja në Irak evokon për disa aspekte atë të Vietnamit
në kohën e luftës dhe fantazma e mundjes së amerikanëve pret pas derës. Temat
që do të përballojë Bush në takime shumëpalëshe dhe dypalëshe kanë të bëjnë me çarmatimin
e Koresë së Veriut, me Iranin, me luftën kundër terrorizmit, me shkembimet ekonomike
në një zonë që ka ritmet më të shpejta të zhvillimit në botë dhe me sfidat që sjell
përhapja e viruseve më të rrezikshëm për shëndetin e njeriut, përhapje që fillon gjithnjë
nga Azia Juglindore. Gjatë natës, Bush do të takohet në aeroportin e Moskës me presidentin
rus Putin, gjë që paralajmëron një bisedë dypalëshe gjatë mbledhjes së Hanoit.
Organizata
palestineze Hamas nuk ka ndërmend të marrë pjesë në një qeveri që njeh Izraelin.
Deklarata është e zëdhënësit të Hamasit, Favzi Bargumi, dhe vë seriozisht në dyshim
përpjekjet për formimin e qeverisë së bashkimit kombëtar. Për organizatën islamike,
zgjidhja e dy shteteve të ndara, mbështetur nga amerikanët dhe bashkësia ndërkombëtare,
do të thotë njohje e Izraelit. Hamasi kërkon gjithashtu që të hiqet embargoja ndërkombëtare
kundër Autoritetit Palestinez. Ndërkaq, kuarteti për Lindjen e Mesme (SHBA, BE,
OKB dhe Rusi) do të mblidhet nesër në Kajro, në përkim me vizitën në Egjipt të presidentit
palestinez Abu Mazen, i cili do të informojë autoritetet mbi bisedimet për formimin
e qeverisë. Kandidati për kryeministër, rektori i Universitetit të Gazës, Mohamed
Shabir ka pranuar detyrën, por nuk dihet se kur do të formohet kjo qeveri.