Përfundoi dje në Vatikan takimi i drejtuesve evropianë të punës baritore për turizmin.
(8.11.2006 RV)Organizator ishte Këshilli Papnor i baritorisë për emigrantët
dhe endacakët, ndërsa tema: “Turizmi, realitet i tërthortë. Aspekte baritore”. Në
takim u theksua se turizmi në veçanti e lëvizja e vrullshme e njerëzve nga njëri vend
në tjetrin në përgjithësi, po ia ndryshojnë faqen famullive e edhe shërbimit të meshtarëve.
Famullia sot është gjithnjë në lëvizje, ndryshon shpesh e meshtarët duhet të kujdesen
vazhdimisht për t’u dhënë mësimet e para të krishterimit njerëzve që nuk kanë dëgjuar
të flitet për Krishtin, sepse vijnë nga kultura e vende të tjera, të largëta e të
ndryshme. Është një sfidë, që Kisha e pranon, për të cilën organizoi edhe takimin
kushtuar baritorisë së turizmit.