18 civilë vriten nga izraelitët në rripin e Gazës. Indinjohet bota.
(08.11.06 RV)“Izraeli ka të drejtë të mbrohet, por jo me çmimin e jetëve të
pafajshme”. Ky është qëndrimi që përshkon pothuaj të gjitha reagimet për masakrën
e mëngjesit të sotëm në Beit Hanun të Rripi të Gazës, ku tanke izraelite qëlluan mbi
shtëpitë e civilëve palestinezë, duke vrarë 18 vetë, ndër të cilët 7 gra e 4 fëmijë.
Numri më i lartë i viktimave palestineze, gjatë katër vjetëve të fundit. U shfaros
krejtësisht një familje prej 13 vetësh e shumë prej të vdekurve, kanë qenë në gjumë
në momentin e bombardimit. Presidenti palestinez, i moderuari Abu Mazen e quajti
gjakderdhjen “masakër të tmerrshme e barbare” dhe kërkoi sëbashku me kryeministrin
Hanijeh, përfaqësuesin e Hamasit në qeveri, mbledhjen e jashtëzakonshme të Këshillit
të Sigurimit të OKB-së. Drejtuesit e Hamasit u kanë kërkuar militantëve islamikë të
rifillojnë sulmet kamikaze në territorin izraelit. Rrezikohen gjithashtu, edhe bisedimet
ndërmjet presidentit dhe kryeministrit për formimin e qeverisë së bashkimit kombëtar,
bisedime që janë pezulluar pas masakrës. Nga Izraeli, reagimet janë në kundërshtim
me njëri-tjetrin. Një pjesë e qeverisë kërkon ndalimin e operacionit “Retë e vjeshtës”
në Beit Hanun dhe hapjen e një hetimi për masakrën e sotme, ndërsa pjesa tjetër kërkon
formalisht falje për vrasjen e civilëve, e cila sipas shpjegimeve “nuk ishte në plan,
por në luftë këto gjëra ndodhin”, dhe thekson se duhet vazhduar operacioni. I
dërguari i veçantë i OKB-së për Lindjen e Mesme, Alvaro de Soto dënoi me forcë ngjarjen
dhe i kërkoi qeverisë izraelite të ndalë operacionin, por edhe palestinezëve të mos
sulmojnë objektiva të Shtetit hebraik. “Shokuese” e ka quajtur masakrën Komisarja
evropiane për Marrëdhëniet me Jashtë, Benita Ferrero-Valdner. Reagime të ngjashme
edhe nga Roma, Brukseli, Londra e Ankaraja, që kanë kërkuar ndërhyrjen ndërkombëtare.
Lidhja Arabe po përgatitet të mbledhë me urgjencë ministrat e saj të jashtëm.