Shumë njerëz sot jetojnë sikur Zoti të mos ekzistonte: këtë nënvizoi sot Benedikti
XVI në audiencë me ipeshkëvijtë zvicëran në Vatikan për vizitë ad Limina Apostolorum
dhe foli mbi rolin e Kishës zvicërane para sfidave të një shoqërie, e cila gjithnjë
më tepër tregon shenja shqetësuese të shkrishterimit, siç po ndodhë edhe në pjesën
më të madhe të Evropës perëndimore;
Të varfërit e botës presin shlyerjen
e borxhit. Kështu deklaroi kardinali Renato Martino duke blerë në Londër, në emër
të Papës, letrën e parë me vlerë të ‚Ndihmës Financiare Ndërkombëtare për Vaksinim,
falë marrëveshjeve multilaterale e bilaterale që do ti hapin vendeve në borxh udhën
për të arritur deri te të mirat që lypet për të „plotësuar nevojat“ themelore për
jetesë e për zhvillim;
Ministria e brendshme e Irakut ka akuzuar 57 punonjës
publikë shtetëror për torturimin e qindra të burgosurve të ngujuar në një burg të
Bagdadit Numër 4 . Ndër ta shumica janë oficierë të lartë të policisë e funksionarë
civilë të periudhës së diktaturës.
Ish presidenti irakian Sadam Hyseini
është paraqitur përsëri sot në sallën e gjyqit në Bagdad në procesin e dytë kundër
tij së bashku me gjashtë persona tjerë bashkëpunëtorë të ij për genocidin e kurdëve
në vitet 80-ta. Të dielën e kaluar ish diktatori është dënuar me vdekje në procesin
e parë për vrasjen e 148 shiitëve;
Reforma Zgjedhore, përgatitjet që lidhen
me procesin zgjedhor si dhe zhvillimet politike në Shqipëri, ishin temat e diskutuara
gjatë një takimi të zhvilluar sot në Presidencë mes Kreut të Shtetit të Shqipërisë
Alfred Moisiu dhe përfaqësuesve të Kuvendit dhe partive. Takimet e Presidentit Mosiu
do të vijojnë me kryetarë të grupeve të tjera parlamentare dhe me zyrtarë të tjerë
të lartë të institucioneve.
Greqia u jep nënshtesi greke minoritarëve që
banojnë në Shqipëri. Vendimi u mor sot në mbledhjen e qeverisë greke dhe ka të bëjë
me të gjithë ata që u është njohur i ashtuquajturi status i homogjenit.
Ministri
britanik për Evropën, Geoffrey William Hoon, sot në Prishtinë tha se Britania e Madhe
mbetet pranë qëndrimit të shprehur nga Grupi i Kontaktit se statusi i Kosovës duhet
të zgjidhet gjatë këtij viti e lajme tjera