Në lutjen e Engjëllit të Tënzot, Papa bëri thirrje për të ndaluar gjakderdhjen në
Rripin e Gazës dhe nxiti reflektimin mbi realitetin e vdekjes.
(6.11.2006 RV)Para lutjes së Engjëllit
të Tënzot, Benedikti XVI shprehu shqetësimin e tij të thellë për lajmet që vijnë nga
Rripi i Gazës, posaçërisht për popullsitë civile, që vuajnë pasojat e akteve të dhunës.
Duke theksuar se situata vijon të keqësohet, Ati i Shenjtë u bëri thirrje të gjithë
besimtarëve të bashkojnë zërat në lutjen e Tij: “… Hyj i gjithëpushtetshëm e
i mëshirshëm, ndritua mendjet autoriteteve izraelite e palestinese, si dhe atyre të
kombeve që kanë pergjegjësi të posaçme në Zonë, që të përpiqen për ta ndaluar gjakderdhjen,
t’i shumfishojnë nismat e ndihmës humanitare e të favorizojnë rifillimin e bisedimeve
të drejtpëdrejta, serioze e konkrete”. Para lutjes mariane, Papa u ndalua tek
përkujtimi liturgjik i të vdekurve, më 2 nëntor, duke reflektuar përsëri për vdekjen
të cilën – pohoi Benedikti XVI – e ashtuquajtura shoqëri e mirëqenies kërkon shpesh
herë ta zhdukë nga ndërgjegja e njerëzve, të zënë siç janë me shqetësimet e jetës
së përditshme. E Papa kujtoi se, pavarësisht nga kënaqësitë që mund të kërkohen, për
të harruar, humbja e njeriut të dashur na e kujton vazhdimisht vdekjen. E parë me
syrin e mendësisë së zakonshme, vdekja na duket thellësisht armiqësore e krejt në
kundërshtim me natyrën tonë, e cila dëshiron jetën e lumturinë. Por – ripohoi Papa
– nuk duhet të harrojmë se Krishti e revolucionarizoi kuptimin e vdekjes. E këtë nuk
e bëri vetëm me mësimin e tij, por duke e përballuar Ai vetë vdekjen. Biri i Hyjit
u bë njeri, për të na hapur përsëri rrugën e shpresës. E Ati i Shenjtë përdori një
shprehje të veçantë për të shpjeguar se: “Vdekja nuk është më ajo që ishte: i është
hequr helmi”. Dashuria e Hyjit, që vepron në Jezusin, i dha një kuptim të ri gjithë
jetës së njeriut, e kështu e shndërroi edhe çastin e rëndë të vdekjes. Kush zotohet
të jetojë si Krishti, çlirohet nga frika e vdekjes, që nuk i tregon më fytyrën tallëse
armike, por, siç shkruan Shën Françesku në ‘Këngën e krijesave’, e shikon me fytyrën
mike të ‘motrës’, për të cilën mund edhe ta bekojë Zotin me fjalët: “Lavdëruar qofsh,
o Zoti im, për motrën tonë, vdekjen e trupit, nga e cila njeri i gjallë s’mund të
shpëtojë”. E Benedikti XVI, duke folur jashtë tekstit zyrtar, kujtoi themelin e
fesë së krishterë, që Shën Françesku e shpreh kështu: Mjerë ata që vdesin në mëkate
mortare; lum ata të cilët vdekja do t’i gjejë në vullnesë tënde gjithëshenjte përsè
prej vdekjes së dytë të keqe nuk do të kenë”. Prandaj: “Nuk duhet pasur
frikë nga vdekja e trupit, na kujton feja: si jetuam, si vdiqëm, jemi me Zotin”
- tha Papa. Jeta njerëzore është kalim nga kjo botë tek Ati qiellor – vijoi Benedikti
XVI – duke shtuar se vdekja e vërtetë, nga e cila duhet të kemi frikë, është ajo e
shpirtit e duke kujtuar se kush vdes në mëkat mortar pa u penduar, duke këmbëngulur
mendjemadhësisht në mospranimin e dashurisë së Zotit, vetpërjashtohet nga mbretëria
e jetës. Prandaj Ati i Shenjtë i ftoi besimtarët t’i luten Zojës së Bekuar që t’i
ndihmojë të jenë gati për ta lënë jetën, për të banuar pastaj përjetësisht me Zotin. Në
çastin e përshëndetjeve në gjuhë të ndryshme, duke folur polonisht, Ati i Shenjtë
kujtoi festën e Shën Karl Borromeut, kremtuar një ditë më parë, duke shpjeguar se
ky përkujtim na fton ta kujtojmë reformatorin e madh të Kishës pas Koncilit të Trentit,
së bashku me atë që vuri në jetë vendimet e Koncilit II të Vatikanit, Gjon Palin II;
Karol Vojtilën. Në gjuhën italiane, Papa përshëndeti posaçërisht besimtarët e
Tainos dhe të sapo krezmuarit e famullisë kushtuar Shenjtorëve Simoni e Juda në Empoli,
të pranishëm në Sheshin e Shën Pjetrit së bashku me famullitarin, katekistët e disa
prindër.Në përfundim u uroi të gjithëve të dielë e javë të gëzuar!