Përkujtimi i të vdekurve – intervistë me kryeipeshkvin Komastri.
(2.11.2006 RV)Një ditë pas kremtimit
të Gjithë Shenjtorëve, sot, më 2 nëntor, Kalendari liturgjik na fton të kujtojmë
besimtarët e vdekur. Pse Kisha i kremton pranë e pranë këto dy festa? Ç’lidhje ka
ndërmjet tyre? Pyetëm për këtë kryeipeshkvin Angelo Komastri, vikar i përgjithshëm
i Shenjtërisë së Tij për Qytet-Shtetin e Vatikanit, në mikrofonin e Radios sonë: Pyetje:
- Njëherësh me solemnitetin e Gjithë Shenjtorëve, nesër, më 2 nëntor, në Kalendarin
liturgjik gjejmë edhe Përkujtimin e të vdekurve . Përgjigje: - Është e qartë
se së bashku me Shenjtorët e Parajsës, kujtojmë edhe ata që drejtohen nga Parajsa,
që janë në Purgator e Purgatori nuk është, thënë simbolikisht, botimi i dytë i Ferrit.
Purgatori është shtëpia e gëzimit, sepse - paradhomë e Parajsës. Më kujtohet famullitari
im i vjetër, që thoshte se Purgatori është si një kurs i gjatë ushtrimesh shpirtërore,
para se të pranohemi në festën e shenjtorëve. Ata që janë në pritje të Parajsës, gjithë
të vdekurit që i përkujtojmë më 2 nëntor, janë njerëz që jetojnë në bashkim me ne.
Ne mund të lutemi për ta e ata për ne. Prandaj është prekëse ta kujtosh edhe këtë
pjesë të dytë të shoqërisë së shenjtorëve, dmth të kujtosh të gjithë shpirtrat që
nuk janë në festën e plotë të Parajsës, por presin akoma në paradhomë. Ta ndjesh bashkimin
me ta, të lutesh për ta e të dish se edhe ata mund të ndërmjetësojnë për ne, edhe
kjo është një arsye që na shtyn të mos ndjehemi kurrë të vetmuar. Pyetje: -
Shkelqësi, ne sot jetojmë në një shoqëri që kërkon me të gjitha mënyrat ta harrojë
vdekjen: si ju duket juve kjo prirje të shoqërisë sonë?Përgjigje: - Frika nga
vdekja ndjehet kur njeriu nuk ka përgjigje para misterit të vdekjes. Në se mendon
se vdekja është një zhytje në errësirë, atëherë sigurisht që të tremb; në se nuk shikon
asnjë rreze drite që vjen nga jeta e përtejme, atëherë sigurisht që jeta e përtejme
të tmerron. Por kur e di se vdekja është vetëm një prag, se vdekja nuk është fund,
se vdekja është fillim, është si porta e hyrjes në një shtëpi të re, ndryshon puna.
Kur fitojmë sigurinë për këtë të vërtetë, të ndritur nga feja, vdekjen mund ta thërresim
qetësisht “motra vdekje”, siç e pati quajtur Shën Françesku. Për fat të keq, shoqëria
jonë është tepër e lidhur me të sotmen, me jetën e përkëndejme, por jeta e këndejme
nuk mund të jetë gjithçka që kuptojmë me fjalën jetë, nuk mund të jetë gjithë jeta.
Kishte të drejtë Nënë Tereza kur thoshte: “Më e bukura nuk ka ardhur akoma”. I krishteri,
që i di këto të vërteta, e shikon vdekjen me qetësinë më të madhe. Kush mendon si
një shkrimtar bashkëkohor, që mbahet si nga më të mëdhenjtë, i cili thotë: “Mendoj
se roli i sojit tim nuk është më i lartë se ai i bletëve, i milingonave ose i harabelave”,
sigurisht që ka tmerr nga vdekja. Në sa ne e dimë se jeta e njeriut është e lartë,
mbart në vetvete farën e amshimit. E ne kemi kohë, në sa jemi ende gjallë, të vendosim
cilin amshim të zgjedhim: amshimin e pranimit të Zotit, apo amshimin e mospranimit
të Zotit? Amshimi i pranimit të Zotit është Parajsa, përjetësia, ndërsa ai i mospranimit
të Zotit, është Skëterra, sepse njeriu pa Zot është i parealizuar; pa Zot, njeriu
është i zbrazur, është plotësisht i palumtur.