Kthehet qetësia në Hungari pas ndeshjeve të djeshme: 130 të plagosur. Lajme të tjera
nga bota.
(24.10.06 RV) U kthye qetësia sot paradite në Budapest, pas ndeshjeve të djeshme
ndërmjet manifestuesve dhe policisë, që vazhduan deri në agim me një bilanc përfundimtar
prej 130 të plagosurish dhe 100 arrestimesh. Ashtu si 50 vjet më parë, në vitin 1956,
kur tanket sovjetike shuan revoltën antikomuniste hungareze, ashtu edhe dje në përkujtimin
e kësaj dite, ndeshje të dhunshme karakterizuan kremtimet. Opozita e djathtë kërkon
dorëheqjen e kryeministrit Ferenc Gjyrçani, i cili ka pohuar vetë se i ka gënjyer
zgjedhësit për gjendjen ekonomike të vendit, vetëm për të fituar votat. Papa Gjon
Pali II pat qenë dy herë në Hungari, siç kujtoi më 22 tetor në katedralen e Shën Shtjefnit
kardinali Angelo Sodano, përfaqësues i Papës Benedikti XVI në kremtime. Në vitin 1993,
vetëm tri vjet pas rënies së komunizmit, Gjon Pali II u drejtohej kështu hungarezëve:
“Është e vërtetë se përfundoi periudha e totalitarizmit që, në emër të ideologjisë
profane të shpëtimit, shtypte fenë dhe besnikërinë e Kishës me masa diktatoriale.
Por, aktualisht, vendi juaj ndodhet nën ndikimin e orientimit konsumist dhe kërcënohet
nga zhdukja e vlerave tradicionale”. “Ekziston – shtonte Ati i Shenjtë – rreziku i
kalimit nga një varësi tek tjetra, që ka prirjen ta pengojë Krishterimin të luajë
rolin e vet të pazëvendësueshëm si pjesë integruese e historisë dhe kulturës hungareze”.
E përfundonte me fjalët e Shën Palit Apostull: “Mos lejoni që t’ju imponojnë sërish
zgjedhën e skllavërisë”.
Gati një vit pas krizës së gazit ndërmjet Rusisë
dhe Ukrainës, marrëveshja e nënshkruar sot ndërmjet dy vendeve mund t’i sigurojë Evropës
një dimër pa probleme ngrohjeje. Sipas marrëveshjes, Kievi do të paguajë 130 dollarë
çdo 1000 metër kub gaz, më shumë se vitin e kaluar kur paguante 50 dollarë, por më
pak se shifra prej 230 dollarësh që i pat kërkuar Rusia qeverisë së Jushçenkos dhe
më pak se 290 dollarët që paguan Gjermania. Kollosi i gazit në Rusi, Gazprom e ndryshoi
kërkesën pas ndryshimit të klimës politike në Ukrainë, ku filoatllantikët e Jushçenkos
u zëvendësuan me filorusët e Janukoviçit. Vjet, reduktimi i fluksit të gazit për Ukrainën
pati pasoja për gjithë Evropën.
Komandanti i forcave amerikane në Irak, gjenerali
Xhorxh Kesei deklaroi sot se forcat irakiane duhet të jenë gati për të marrë në dorë
kontrollin e territorit brenda 12 ose 18 muajve të ardhshëm. Këto forca kanë pasur
rreth 300 martirë në gjirin e tyre, të vrarë në luftimet me rebelët. Ne vend, akoma
vazhdojnë ndeshjet ndërmjet popullsive që përfaqësojnë rryma të ndryshme të fesë islamike.
Parlamenti evropian votoi sot një seri masash për azhornimin e Sistemit Informativ
Shengen, banka e të dhënave në dispozicion të autoriteteve kompetente të shteteve
anëtare. Këto të dhëna janë të konsultueshme tani edhe nga shtetet e reja anëtare.
Janë parashikuar të dhëna të reja, që mbajnë parasysh luftën kundër terrorizmit dhe
fenomenin e emigracionit.